Sah Maw Mare na Nawku Hpung Ningbaw Marai 3 Hte Hpawn Mare Myitsu Kanu Kawa Nkau Hpe Myen Hpyen Dap Rim Woi Da.
Htingnai ginwang Sah Maw mare na Mare uphkang salang hpe mying nchye ai wuhpung ni rim woi mat ai hpang, Shanglawt Hkristan Nawku jawng wang hta shayi sharawt lamang a matu bungli galaw nga ai mung shawa marai 60 jan hte mare kata mung shawa nkau hpe Myen dap sa rim woi mat ai lam ginra masha ni kaw na chye lu ai.
March 31 ya shana hkying 3 daram hta, Sah Maw mare up hkang salang Than Aung Kyi hpe mying n chye ai laknak lang wuhpung ni myiman magap let sengke hte shang wa nna sa rim woi mat ai lam chye lu ai.
Ya na zawn mare salang rim woi hkrum mat ai hpang, Sah Maw Shanglawt Hkristan Nawku Jawng wang hta shayi sharawt poi a matu bungli sa garum taw nga ai mung shawa marai 60 daram hte laga lawk hkan na mung shawa mare masha yawng pawng marai 70 daram hpe Myen hpyen dap rim woi mat ai rai nga ai.
Dai rim woi mat wa ai, yawng ngu na ram hpe dai hpawt manap bai dat ya sai rai tim, Nawku hpung ningbaw marai 3 hpe gaw ya ten du hkra rai ndat ya ai sha, matut rim woi da ai nga, rim woi ai kaw na bai lawt wa ai mung shawa langai KNG shiga dap de tsun dan wa ai re.
“Nkau yawng hpe gaw dat ya sai, ya rai ndat ya shi ai gaw Sah Maw buga hkalup hpung na Hpung Up Sara hte ICM kaw na Sara langai the Hpung tau langai hpe rai ndat ya shi ai, ya shan hte na masa hpe yu yang gaw, mare salang wa hpe sha ndat ya yang ndai sara ni hpe mung ndat ya ai ngu masa re hpe mu lu ai” nga tsun ai re.
Ya rim woi da ai ni gaw, Sah Maw Buga Hkalup hpung na, hpung up shara hte Shalawt Hkristan na Hpung Up langai Hpungtau langai, yawng pawng marai 3 hpe matut rim woi da ai re.
Hpung sara marai 3 hpe, Nawku jawng wang kata kaw na sumri gyit dun woi mat wa nna, KIA hte PDF ni a mayam re ngu marawn shangun nna, rim woi mat ai lam matut chye lu ai.
Ya ten Nawku hpung ningbaw marai 3 hte mare kata na myitsu kanu kawa marai 10 daram hpe Sah Maw Myen hpyen dap Hk.L.Y 105 dap kata hta rim woi da nna, laga mung shawa n kau ni mung hprawng yen taw nga ai lam chye lu ai.
