Nba Pa Ninghtawn Jan Mai Mare Hta Nbungli Bawm Hte Mung Shawa Marai 7 Si, Nta 2 Hten
Loi Je hte Man Je lapran na, Janmai mare hta Myen hpyen dap nbungli hte bawm wa jahkrat bun ai majaw, Mawdaw la ni hte hpawn mung shawa marai 7 asak si sum nna, nkau hkala hkrum wa ai lam dai ginra mung shawa ni kaw na chye lu ai.
April praw 1 ya jahpawt hkying 1:15 ten Nba Pa ninghtawn Loi Je hte Majan sa lam lapran na Jan Mai mare hta nbungli bawm wa jahkrat bun ai hta,, hpyen yen taw nga ai mawdaw la ni hte hpawn mung shawa marai 7 asak si sum wa ai re nga, ndai zawn tsun dan ai re.
“Dai kaw si hkrum ai law malawng gaw Mawdaw la ni rai nga ai, ya hte Loi Je de grai shuk wa ai majaw, ndai maga de gan yen taw nga ai ten kaw nbungli bawm hte si hkrum ai ga rai nga ai, mawdaw kata kaw si taw ai madu jan hte kasha mung lawm ai, dai ni na mying gaw n lu sagawn shi ai,” nga tsun ai re.
Asak si sum ai ni gaw, Slg E Kyaw, Shd Zau Myu Awng, Slg Hkyin Mawng Yin, Slg Nyi Maung, Shd Win Min Oo ni rai nna, mawdaw kata kaw si taw ai madu jan hte kasha mying hpe gaw n lu sagawn ai lam tsun tawn ai re.
Nbungli bawm hte Jan Mai mare kata na mung shawa dum nta lahkawng yawng hten mat nna, dai kaw shadun da ai mawdaw 2 mung yawng hten ayai mat ai lam matut chye lu ai.
Loi Je mare Myen hpyen dap yawng hpe Wunpawng Mungdan Shanglawt Hpyen dap KIA wang matep da ai majaw, dai mare na mung shawa yawng tinang man ang ai shara de hprawng yen taw nga ai ten ya na zawn nbungli bawm hte si hkrum wa ai re.
Dai nbungli bawm a majaw, hkala hkrum ai mung shawa yawng Manmaw ginwang mung shawa tsi rung hta tsi tsi hkam la taw nga ai re lam chye lu ai.
Ndai laman Nmawk hte Loi je lapran Myen hpyen dap yawng hpe KIA dap maga htim shagrawt taw nga ai hta, Myen hpyen dap maga sum machyi lam ni law wa ai majaw, March 31 ya shana nbungli bawm hte dai grup yin ni hta laja lana wa jahkrat bun wa ai rai nga ai.
