Myen Hpyen Daru Magam Zing Ai Shani Rim Hkrum Ai Jinghpaw Mung Hkringmang 2 Lawt Pru Wa
Myen hpyen dap daru magam zing ai shani rim woi da ai Jinghpaw Mungdaw Hkring mang marai 2 hpe, shalawt nhtoi gu ai majaw, lawt pru wa sai re lam chye lu ai.
Salang Zahkung Naw Li (Sipin Hkringmang) hte Slg Win Nyut ( လျှပ်စစ်နှင့် စက်မှုလက်မှုဝန်ကြီး) yan hpe dai ni April praw 1 ya shani Myitkyina Htawng kaw na shalawt dat ai lam NLD Party hte ni nawn ai ni KNG shiga dap de tsun dan ai re.
“N’ta masha ni hpe san yu yang re nga tsun ai, shan hte hte nan gaw rai n lu hkrum shaga shi ai, dai ni shalawt ya sai nga tsun ai. Madung gaw daru magam zing ai shani ra lata poi amu mang hkang hte nga na yawng hpe rim woi da ai hpang, tara kanu masat amyu myu ga baw dat nna, rim sharen da ai rai nga ai, ya shalawt dat na nhtoi gu ai majaw shalawt dat ai re ngu mu lu ai.” nga tsun ai re.
Shan yen lahkawng hpe Myen hpyen dap mungdan daru magam zing ai ten, masha hpawng chyawm ai tara kanu masat (29) Hpyen dap hpe sari jahpoi ai tara masat (505) Mayun kumhpa la ai tara kanu masat (55) ni hte April 22 ya shani Jinghpaw mung tara rung daju kaw na htawng dam 3 ning e shata 6 jahkrat hkrum ai rai nga ai.
Myen hpyen dap daru magam ahkang aya zing ai shani Jinghpaw mungdaw asuya rung yawng hpe mung Myen hpyen dap ahkang aya yawng zing kau nna, hkring mang yawng hpe rim woi kau ai hta, shawng ningnan lawt pru wa ai hkring mang yan rai nga ai.
