Jinghpaw ni Japan dang manau nau wa ai Nmawk hte Loi Je lapran na Sinlum Bum Myen hpyen byuha dap kaba hpe Wunpawng Mungdan Shanglawt Hpyen dap KIA hte pawng hpawm dap maga, dai hpawt manap hkying 7 daram hta tsep kawp yawng htim shagrawt kau lu sai lam chye lu ai.
March 31 ya shani kaw na dai dap shara hpe KIA hte pawng hpawm dap maga htu shadut htim gasat hpang wa ai gaw, April praw 1 ya jahpawt hkying 7 daram ten htim gasat zing madu kau lu sai nga, Loi Je ginra masha langai KNG de ndai zawn tsun dan wa ai re.
“Mana kaw na gaw Myen hpyen dap kata de shang lu sai, rai tim jan grai du mat ai majaw dai hpawt she a tsawm jasan kau ai, ya dap kata na laknak machyu pala ni htaw la taw nga ai, majan hta Myen hpyen dap maga tsawm ra machyi mat ai nga tsun ai, mana anhte maga na ni Myen mang hte rau she yup kau ra ai nga, nkau gaw hprawng mat ai,” nga tsun dan ai re.
Sinlum Myen hpyen dap hpe htim shagrawt ai hta, Myen hpyen dap maga si hkala law wa ai majaw, dai kaw naw rawng nga ai Myen hpyen hpung ni, shana jan du ai hpang,yawng hprawng pru mat ai nga shawng lam magam gun ni matut tsun dan ai re.
Myen hpyen hpung ni hprawng pru mat ai hpang, Myen hpyen dap maga, nbungli hte laja lana wa gap bun ai sha n ga, အတွဲလိုက်ဒုံး ni hte mung gap gasat wa ai lam chye lu ai.
Dai dap shara hpe htim shagrawt ai hta, Myen hpyen dap maga si hkala law ai sha n ga, dai kaw na laknak machyu pala alaw alam hpe mung padang dip zing madu la lu ai re.
Sinlum Myen hpyen dap kaba gaw, Nmawk Loi Je lapran kaba dik byuha dap kaba langai rai nna, dai shara hta hpyen n-gun 200 jan hte shaning 60 ning jan dap jung shara jahkrat lai wa ai dap kaba mung rai nga ai.
Sinlum Myen Hpyen byuha dap kaba gaw Myen Miwa gunrai ginlen dabang kaba Loi Je de htaw shalai bang ai gun rai mawdaw yawng hpe san jep let gumhpraw hta sha taw nga ai dap shara mung rai nga ai.
Dai dap shara kaw na sha KIA Dapba 3 ginra shara ni hte Mai Ja Yang muklum kaba, Nmawk mare kaba ni de laknak kaba gap shadam bun taw ai dap shara re lam ginra masha langai ndai zawn matut tsun dan wa ai re.
“KIA dap a Sinpraw Ginwang Ginjaw kata ndai daram kaba ai dap shara n nga sai, dai majaw ndai mayan kaba dik gaw Sinlum hte Yaw Yung Bum re, dai shara ni kaw na Mai Ja Yang makau grup yin de laknak kaba aten n tam majoi gap shadam bun bun re dap shara ni rai nga ai.” nga tsun ai re.
Nmawk hte Loi Je lapran na Myen hpyen dap shara ni hpe KIA hte pawng hpawm dap ni March 27 ya shani kaw na htim shagrawt hpang wa ai gaw, ndai bat mi laman hta dai mayan na Myen hpyen dap yawng hpe gasat shamyit kau lu ai lam rai nga ai.
Ya ten Loi Je mare kata hta sha Myen hpyen dap nga taw sai rai nna, dai shara hpe htim gasat na matu, Miwa asuya a dip n-gun jaw ai lam a majaw, dai ni du hkra Loi Je mare kata majan byin ai lam n nga jahkrup bawng ban taw nga ai re.
Loi Je mare kata hta nga ai mung shawa n kau mung, March 31 ya laban shani kaw na, tinang man ang ai shara ni de hprawng yen taw nga ai re.
