Hopin Mung Nyang Hka Makau grup yin hta Myen Hpyen Dap Sam Hkyeng Pawng hpawm hpung ni hte KIA dap lapran gap gasat hkat wa ai hpang, Sam Hkyeng dap shara hpe Drone hte sa gap bun ai hta Sam Hkyeng dap maga si hkala law wa ai nga, dai ginra na mung shawa ni tsun ai re.
March 31 ya jahpawt hkying 9 daram hta, Monyin kaw na Hpakant de hpyen n-gun garum na matu hpri gang mawdaw 3 hte hpyen n-gun 200 daram hpe hkap shingla gasat ai kaw na majan byin wa ai re lam dai ginra na mung shawa langai KNG shiga dap de tsun dan ai re.
“Hpakant de hpyen n’gun kaba hte bai htu lung wa ai hkyen ai, Hpri gang mawdaw ni hte rai lung wa ai hpe anhte maga na ni hkap shingla gasat ai, Drone hte mung gasat ai, marai 9 daram si ai nga na ai,” KPDF hte ni nawn ai mung shawa langai tsun ai re.
Dai Hpyen hpung ni hpe hkap shingla gasat ai hta Myen hpyen dap maga sum machyi lam ni law wa ai majaw, Holicopter nbungli Mi 35 hte sa gap bun wa ai lam chye lu ai.
Holicopter hte sa gap bun ai hta mung, Sam Hkyeng Hpyen hpung ni hpe gap gasat hkra ai majaw, sam hkyeng maga de na si hkala lam ni nga wa ai re.
Dai hpang, Sam Hkyeng Myen hpyen da hpe KIA dap maga drone hte sa gap bun ai hte mung sum machyi lam ni law wa ai nga KPDF dap ni tsun ai.
Hkala hkrum ai ni hpe Myitkyina Myen hpyen dap tsi rung de htaw mat wa ai lam matut chye lu ai.
Hkap gap gasat hkrum ai hta Myen hpyen dap maga de na Dujum langai mung si hkrum wa nna, n kau law malawng hkala hkrum ai re.
Ya ten dai shara hta Myen hpyen dap hte KIA dap lapran hpyen masa matut shaja hkat taw nga ai rai nna, laknak kaba ni jahkring hkring gap bun hkat taw nga ai re.
