Yaw Yung Bum Myen Hpyen Dap Kaba Hpe KIA Dap Htim Gasat Nga
Myen Hpyen Dap Ni Mai Ja Yang Hte Loi Je Mare Ni De Laknak Kaba Gap Bang
Nmawk hte Loi Je lapran na Yaw Yung Bum Myen hpyen dap kaba hte hpawn laga dap shara 4 hpe Wunpawng Mungdan Shanglawt Hpyendap KIA hte pawng hpawm dap ni htim gasat taw nga ai hta, Myen hpyen dap maga na mung nbungli hte sa gap bun taw nga ai re.
March 27 ya jahpawt jau kaw na, Sinlum mayan na Myen hpyen dap hte Yaw Yunng Bum dap shara ni hpe htim gasat taw nga ai lam, shawng lam magam gun langai KNG shiga dap de tsun dan ai re.
“Yaw Yung Bum na shawng lam dap ni rai nga ai, Bang Yau, Shang Dai, shara ni hpe gap gasat taw nga ai, Zinlum kaba gaw rai n gap shi ai, Myen hpyen dap maga na mung nbungli hte sa gap taw ai, laknak kaba ni mung gap bun taw nga ai.” nga tsun dan ai re.
Yaw Yung Bum hte Simlum Dap kaba ni hta Myen hpyen byuhamu dung ai dap shara ni rai nna, dai dap shara ni hpe moi kaw na shagreng da ai dap shara kaba ni re lam chye lu ai.
Ya htim gasat taw nga ai Yaw Yung Bum makau grup yin hta, ရှေ့တန်းကာကင်းပို့စ် 10 daram nga ai hpe mu lu ai re.
Ya na zawn Yaw Yung Bum hpe sa htim gap gasat dat ai hpang, Myen hpyen dap maga laknak kaba ni hte Mai Ja Yang hte Loi Je mare ni de gap bun wa ai lam nga ai re hpe chye lu ai.
Myen hpyen dap ni kaw na Mai Ja Yang Loi Je mare ni de laknak kaba gap bun ai majaw, dai mare kata nga mung shawa yawng tinang man ang, shim lum ai shara ni de hprawng yen taw nga ai re.
Mani March 26 ya shani hta mung, Kung Law, Myothit, Salawng Kawng, Lung Ja Bum hte Udang bum dap shara ni hpe zing madu la lu wa ai re.
