Simlum hte Yaw Yung Bum Mayan Na Myen Hpyen Dap Shara Hpe Htim Gasat Ai Hta Shawng Lam Makawp Dap Shara 3 Hpe Htim Gasat Zing Madu
Yaw Yung Bum hpe Matut Htim Gasat Nga
Nmawk hte Loi Je lapran na Yaw Yung Bum Myen hpyen dap kaba hte hpawn laga dap shara ni hpe Wunpawng Mungdan Shanglawt Hpyendap KIA dap htim gasat taw nga ai gaw, dai nil ani mi laman dap shara 3 hpe htim gasat zing madu la lu ai lam Dukaba Naw Bu tsun ai re.
March 27 ya jahpawt hkying 7 daram aten kaw na, dai na maga hkying 4 daram aten du hkra rai yang, Yaw Yung Bum a makawp dap ni rai nga ai Shang Tai Bum, Bang Yau dap hte Sinlum Bum Myen hpyen dap a sin makawp dap shara rai nga ai, Law Mun dap shara ni hpe zing la lu ai nga tsun ai re.
“Dai ni gaw lahta Sinlum makau na Shang Tai Bum, Bang Yau, Law Mun nga dai hte zing ma ai” nga tsun dan ai re.
Matut na mung, Yaw Yung Bum Myen hpyen dap shara hpe htim gasat taw nga nna, majan laja lana matut gap gasat hkat taw nga ai re.
Ya na zawn Myen hpyen dap shara ni hpe htim gasat ai hta, Myen hpyen dap maga na mung Y-12 nbungli hte bawm sa jahkrat bun ai lam ni nga ai zawn, laknak kaba hte mung hkrup mara gap shadam bun taw nga ai lam chye lu ai.
Yaw Yung Bum hpe sa htim gap gasat dat ai hpang, Myen hpyen dap maga laknak kaba ni hte Mai Ja Yang hte Loi Je mare ni de gap bun wa ai lam nga ai re hpe chye lu ai.
Sinlum Bum hte Yaw Yung bum kaw na, Mai Ja Yang makau grup yin de laknak kaba 10 lang gap bun ai hta, 8 lang gaw muklum kata wa hkrat nna, lahkawng lang gaw, Miwa jarit hta wa hkrat ai lam ginra masha ni tsun ai re.
Myen hpyen dap ni kaw na Mai Ja Yang Loi Je mare ni de laknak kaba gap bun ai majaw, dai mare kata nga mung shawa yawng tinang man ang, shim lum ai shara ni de hprawng yen taw nga ai re.
