Nawnglut Ginwang, Na Mawn mare, Natgyikung lawk na mare salang hpe, dai hpawt manap jau mying n chye ai ni kaw na sinat hte sa gap sat kau da ai lam chye lu ai.
Natgyikung lawk na Namawn manap gat hta madu jan hpe gat sa hkyen garum taw nga ai ten, sa gap sat kau da ai re nga, ginra masha ni KNG shiga dap de tsun ai re.
“Dai hpawt manap jau hkying 4 daram hta madu jan hpe gat sa hkyen garum taw nga ai ten gap sat hkrum ai re, gap sat hkrum ai hte Myitkyina de htaw mat wa ma ai,” nga tsun ai re.
Ya gap sat hkrum ai mare salang, Htay Aung gaw, Sam Hkyeng Pyithutsit hpung shang salang langai rai nna, Myen hpyen dap a matu hpyen hkan lahkawn ya taw ai salang re lam matut chye lu ai re.
Ramma ni hpe Myen hpyen dap de shang na matu hkan tsun ai hta mung jahkrit sharim let hkan tsun ai lam ni mung nga ai re hpe chye lu ai.
Ya na zawn gadai gara wuhpung ni gap sat ai re hpe a tsawm tup hkrak n chye lu ai rai tim, Baw kaw sinat lahkawng lang gap hkra ai majaw, asak si hkrum wa ai re lam chye lu ai.
Gap sat hkrum ai Slg Htay Aung a moi mang hpe Myitkyina de htaw mat wa ai lam matut chye lu ai re.
Myen hpyen dap daru magam zing ai hpang, 2021 hte 22 ning laman hta mung Myen hpyen dap hte pawng hpawm ai mare salang ni gap sat hkrum ai lam nga wa ai hpang, ya kalang hpyen lahkawn ya ai gabaw hte ndai lamang dai zawn lam ni bai byin wa ai rai nga ai.
Dai ning February 10 ya shani hta Myen hpyen dap asak ram ai ramma ni yawng hpyen magam gun na tara matsun shapraw dat ai hpang, ya na zawn mare salang ni hpe masha gahkyin shangun wa ai rai nga ai.
