Mogaung ginwang kata, hkau na pa hta nga rem taw la wa ngan langai, Myen hpyen dap hkam da ai bawm kabye kapaw la hkrup ai majaw, asak si sum wa ai lam chye lu ai.
March 26 ya shana maga hkying 3 daram hta, Mogaung ရွှေတိဂုံ hpara n pu na Hk.L.Y (74) dap dingsa hkauna pa hta nga rem taw nga ai ten, Myen hpyen dap hkam da ai bawm kabye kapaw la nna, asak si sum wa ai nga, dai ginra na mung shawa langai KNG shiga dap de tsun dan wa ai re.
“Bawm kabye kapaw si ai hpang Myen hpyen dap ni Myitkyina de kalang dat sa kau ai, nta masha ni hpe mung n jahkrum shangun ai, moi mang nat na mahka she jahkring mi sa gan yu shangun ai,” nga tsun ai re.
Dai Bawm kabye kapaw si ai wa gaw, asak 46 ning daram re ai wa rai nna, Mogaung Naung Kai Taw mare na re lam chye lu ai.
Lai wa sai ten dai shara ni hta, mung shawa ni wang lu wang lang nga rem ai shara ni rai nna, ndai laman jinghpaw mung de majan laja wa ai kaw na ya na zawn, shara shagu bawm hkam wa ai masa re lam ginra masha ni tsun ai re.
Dai shara hta lai wa sai ten ni hta mung bawm kabye kapaw la hkrum ai lam ni nga wa ai re.
