Majan Laja Taw Nga Ai Nmawk Ginwang Kata Phone Internet Line Yawng Pat Da Ya
Majan laja taw nga ai Nmawk ginwang, Myothit Kung Law mare ni hta Phone Internet line yawng pat hkrum taw nga ai lam chye lu ai.
Lai wa sai March praw 7 ya shani kaw na, Wunpawng Mungdan Shanglawt Hpyen dap KIA hte PDF pawng hpawm dap ni Myitkyina Manmaw lam kaba ntsa na Myen hpyen dap shara ni hpe htim gasat taw nga ai gaw, dai ni ndai ten du hkra rai yang, Myen hpyen dap dung kaba 4 hte dap shara 30 jan hpe htim shagrawt kau lu sai re.
Dai zawn Myen hpyen dap hpe htim shagrawt taw nga ai hta, Num Lang, Nawng Kawn dap shara ni hpe htim gasat zing madu kau ngut ai hpang, dai ginra yawng hta Phone Internet line pat kau ya ai rai nga ai.
Ya ten, Myothit Kung Law mayan na Bum marawn ni hpe KIA htim gasat shagrawt taw nga ai rai nna, dai ni ten du hkra majan laja lana matut gap gasat hkat taw nga ai lam chye lu ai.
KIA kaw na ya na zawn Myen hpyen dap hpe htim shagrawt taw nga ai hta, March 24 ya shana Nmawk hte Manmaw lapran na Deng 5 mare du hkra gap gasat hkat taw nga sai re.
Ya na zawn mare kata ni de gap gasat hkat wa ai majaw, Manmaw hte Nmawk na mung mare masha ni yawng tinang man ang ai shara ni de hprawng yen taw nga ai lam chye lu ai.
Manmaw Hpyen yen dabang ni hta nga ai hpyen yen mung shawa yawng mung tinang mare buga de bai n htang wa taw nga sai re.
