Sumprabum Majan De Putao De Na Hpyen N-gun Garum Du Mat Ai Majaw Majan Matut Laja Nga
Sumprabum Myen hpyen dap de Putao maga de na Pyithutsit dap ni nam lam hku na hpyen n-gun bai du wa ai majaw, dai ni ten du hkra majan laja lana matut gap gasat hkat taw nga ai re.
Sumprabum Myen hpyen dap hpe KIA dap maga lai wa sai March 14 ya shani kaw na htim gasat taw nga ai gaw, Myen hpyen dap maga, hkying hkum mi hta kalang nbungli bawm wa jahkrat bun taw nga ai sha n ga, Putao maga de na hpyen n-gun bai du jat ai majaw, dai dap shara hpe lu zing na matu yak hkak taw nga ai lam, shawng lam magam gun hte ni nawn ai ni kaw na chye lu ai.
“Nbungli hte shani shagu wa gap taw nga ai, nayi hkying hkum mi hta kalang dai hku na wa jahkrat bun taw ai, ngut na ya hte Putao maga de na Pyithutsit ni hpyen n-gun garum sa wa ai ni mung ndai kaw na ni hte sa lu pawng hpawm mat majaw, grau yak mat ai ga rai nga ai.” nga tsun dan ai re.
Sumprabum Hk.L.Y 46 dap hpe htim gasat ai lam hta, Patao de na Rawang Pyithutsit hpyen hpung ni sa du ninghkap shingla gasat taw nga ai majaw, dai ni ten du hkra dai dap shara hpe n lu zing madu ai nga tsun ai re.
Ya na zawn majan chying hkraw galu wa ai majaw, nam maling de hprawng yen taw nga ai Sumprabum hpyen yen mung shawa ni hta, malu masha hte laga tsi mawan lam ni grai yak hkak wa taw nga ai lam dai ginra na hpung magam gun ni tsun ai re.
Dai ginra na mung mare masha ni gaw, lai wa sai March praw 8 ya shani kaw na hprawng yen hkawm nga ai gaw, nhtoi 20 ya hkawt du wan ga sai re.
Majan a majaw, Myitkyina Putao lam kaba hpe dai ni ten du hkra pat da taw ding yang re hpe chye lu ai.
