Sumprabum buga mare masha ni gaw, lai wa sai nhtoi 10 ya jan kaw na, nam maling de hprawng yen hkawm taw nga ai gaw, aten nhtoi na wa ai hte rau malu masha lam ni yak hkak wa taw ai lam chye lu ai.
March praw 8 ya shani kaw na Sumprabum mung mare masha yawng gaw, nam maling ni de hprawng yen hkawm nga ai rai nna, ya ten malu masha hte tsi mawan lam ni yak hkak dumhprut wa taw nga ai lam dai ginra na lit nga ai sara langai KNG shiga dap de tsun dan ai re.
“Nkau nam maling de hprawng yen taw nga ai, nkau gaw majan nbyin ai mare ni de hprawng yen ai, ya hpyen yen aten na wa ai hte rau malau masha hte tsi mawan ni ra ahkyak ai ga rai nga ai, ya mawdaw lam mung pat taw ai re nga yang mung shawa yawng gaw lam shagu yak hkak wa ai ga rai nga ai” nga tsun ai re.
Majan nhpan a majaw, Myitkyina Putao lam hpe lai wa sai March praw 8 ya shani kaw na pat kau ai majaw, malu masha hte laga gun rai ni hpa n shang mat nna, grau yak hkak mat ai re lam chye lu ai.
Ya ten nam maling de hprawng yen taw ai hpyen yen mung shawa tsaw kaba rai nna, n kau Sumprabum lam mayan na Su Yang, Mai Htawng, Hka Garan Yang, Nta galu mare ni hkan hprawng yen taw ai re.
Ya ten Sumprabum mare makau grup yin na mung shawa yawng hprawng yen taw nga ai rai nna, mare kata kadai mung n nga mat sai majaw, n ten galu na wa ai rai yang mung shawa ni hta mayak mang hkang law wa na re majaw, yawng a matu hkawm sa hkawm wa loi ai shara hte gan shing byi na dum nta ni ra ahkyak taw nga ai lam, ndai zawn matut tsun dan wa ai re.
“Ya Sumprabum mare kaw gaw gadai n nga sai ga rai nga ai, yawng hprawng yen ma sai, nkau nam maling de tinang mai byin ai hku muga ginsum hte nga taw ai, nkau gaw jinghku nta hkan matsut matsat rai nga taw ai, dai majaw ya aten galu na matu hpyen yen dum n’ta ni hpe hkyen lajang na matu gaw hkyen nga ga ai,” nga tsun ai re.
Sumprabum Myen hpyen dap kaba hpe Wunpawng Mungdan Shanglawt Hpyen dap KIA hte KPF, KPDF pawng hpawm dap ni htim gasat taw nga ai hta, Myen hpyen dap maga de na Y-12 nbungli hte Minute 15 hta kalang bawm wa jahkrat bun nna, majan matut laja taw nga ai re.
Putao de na hpyen n-gun 50 daram du wa ai majaw, ya ten Myen hpyen dap hpe htim shagrawt kau lu na yak hkak wa taw nga ai lam dai shara hta du nga ai shawng lam magam gun ni tsun ai re.
Sumprabum Myen hpyen dap hpe KIA dap maga na mung n lu n mai ladat shaw htim gasat taw nga ai maajw, dai ni ten du hkra majan laja taw ai re.
Sumprabum mare Myen hpyen balik dap hpe March praw 8 ya shani sa htim gasat ai hta, Myen hpyen balik marai 13 laknak jahkrat asum jaw wa ai re.
Dai hpang march 14 ya shani kaw na Myen hpyen byuha dap kaba hpe htim gasat taw nga ai gaw dai ni ten du hkra re lam chye lu ai.