Na Hpaw Bum Myen hpyen dap shara hpe Wunpawng Mungdan Shanglawt Hpyen ap KIA hte pawng hpawm dap maga, dai hpawt manap htim gasat zing madu kau lu sai lam chye lu ai.
Dai dap shara ni hpe lai wa sai March 17 ya shani kaw na, laknak kaba, Drone ni hte sa htim gap gasat hpang wa ai gaw, nhtoi 5 ya na ai hpang, dai mayan na dap shara yawng hpe htim gasat zing madu kau lu wa ai re nga, shawng lam magam gun langai KNG de tsun dan wa ai re.
“Lisu Pajau gaw ya hte 18 ya shani shan hte hkrai shan hte yawng hprawng mat ai, ngam ai dap 5 hpe gaw anhte nan htim gasat zing mat wa ai rai nga ai, Ndai ရင်ဆိုင်ကုန်း ၊ Point 667, U Ga Shan, U Law Kawng, Na Hpaw Byuha kawng ni hpe gasat zing la ai rai nga ai, dai hpawt gaw naw ngam taw ai, Na Hpaw Byuha hte U Ga Shan dai hpawt bai zing shakre kau ai, yawng ma sai ga rai nga ai” nga tsun dan ai re.
Dai shara ni majan laja lana gap gasat hkat taw nga ai ten, Myen hpyen dap maga na nbungli hpan hkum hkra hte shani shagu wa gap bun wa ai re.
Dai hpawt manap htim gasat zing madu kau lu ai hpang rai tim, nbungli hte matut wa gap taw nga ai nga matut tsun dan wa ai re.
Dai dap shara gaw, KIA ginjaw ginra Pa Jau hte Laiza lapran dap jung da ai, Myen hpyen dap kaba rai nna, lai wa sai shaning 30 ning ram kaw na kring mading dap jung da ai shara re lam chye lu ai.
Na Hpaw Bum Myen hpyen dap gaw, Ginjaw ginra makau grup yin hta a hkyak ai dap shara langai rai nna, dai dap shara kaw na, Laiza, Laisin mare ni de laknak kaba gap bun taw nga ai dap shara mung rai nga ai.
Dai dap shara hpe lai wa sai 1986 ning hta Myen hpyen dap htim gasat zing madu la kau ai shara rai nga ai.
