Jinghpaw Mungdaw kata, Myen hpyen dap kaw na hpyen magam gun na matu, seng ang ai mare komiti salang ni kaw na, laika hte saw shaga ai lam ni galaw taw nga ai lam Myitkyina Ginra masha ni kaw na chye lu ai.
Ndai shata 15 ya hpang kaw na, Myitkyina, Manmaw, Monyin hte laga muklum kaba ni hta, mare lawk uphkang salang ni kaw na, hpyen magam gun na matu, laika hte saw shaga ai lam ni galaw hpang wa nga sai lam Manmaw ginra masha langai KNG shiga dap de tsun dan wa ai re.
“Manmaw muklum kata hta gaw, ninghtawn 56 nga ai kaw na, ya shawng ningnan lang hta asak 30 hte 35 ning lapran na ni hpe hta gahkyin taw nga ai, numdaw lahkawng lang ngu na hta she 30 ning n pu na ni hpe bai hta mat wa na nga tsun ai,” nga tsun dan wa ai re.
Ya mying jahpan hta ai hta, ndai kalang na hpyen magam gun na jahpan kaw, lawk mare langai na masha yawm htum marai 20 ram lahkawn sa mat wa na lam Manmaw ginra masha ni matut tsun dan ai re.
Ya ten Manmaw muklum kata hta, Hpyen magam gun na matu asak ram ai ni yawng March shata 18 ya shani hpang jahtum mying jahpan sa jaw ra na re lam tsun da ai re.
Dai zawn sha Monyin, Indaw, Na Mawn mare ni hta mung ndai shata 18 ya shani hpang jahtum tawn, mare salang ni kaw mying jahpan sa jaw ya na matu, nta di di laika hte hkan shadu da ai lam dai ginra na mung shawa langai KNG de matut tsun ai re.
Ya na zawn Myen hpyen magam gun na matu saw shaga ai hta, mare salang ni nan phone set nna, hkan saw shaga taw ai hta, saw shaga ai ten kaw n sa wa na lama ma byin wa ai rai yang lit n la ai nga na, tsun jahkrit ai lam ni mung nga taw ai hpe chye lu ai.
Ya na zawn Myen hpyen dap maga de na laja lana hpyen la n galaw n mai hkan matsun wa ai lam hte seng nna, mung shawa ni yawng Myen hpyen dap de n shang ai sha, ni nawn ai PDF hte Wunpawng Mungdan Shanglawt Hpyen dap kata de matut mahkai shang wa na matu tsun ndau da ai lam nga ai re.
Mare salang ni hku na mung Myen hpyen dap hte pawng hpawm nna, ndai zawn re magam bungli lam ni hta n shang lawm na matu PDF dap maga tsun sadi jaw da ai lam nga ai hpe chye lu ai.
Ya na zawn tsun sadi jaw da ai lam hpe n hkan sa na byin wa lam yawng tinang dinghkrai hkam la ra na re lam ndau laika ni hta tsun da ai re.
