Hpyen Yen Dum N’ta Ni Hpe Myen Hpyen Dap Hte Pyithutsit Dap Ni Adup Hpaw Nna Lagu Mya Sha Taw Nga
Waimaw Aungmye (1), Aung Mye (2) hte Shwe Nyaung Pin Mare hkan na mung shawa ni hprawng shakram kau da ai dum nta ni hpe Myen hpyen dap hkan adup hpaw nna, manu dan ai arung arai ni hpe lagu mya la taw nga ai lam, ginra masha ni kaw na chye lu ai.
Majan majaw, ngam kau da ai hpyen yen mung shawa dum nta ni hkan na, n-gu hte laga manu dan ai arung arai ni hpe Myen hpyen dap htaw lahka la taw nna, gat seng hkan na shan hte ra ai arung arai ni hpe mung lagu shaw la taw nga ai lam, dai ginra na hpyen yen mung shawa langai KNG shiga dap de tsun dan wa ai re.
“Ya mare de gadai n nga sai, dai makau grup yin yawng hta Myen hpyen dap shara la da ai, mare masha n’ta hkan na n-gu ni hpe mawdaw hte hkan htaw gahkyin la hkawm taw nga ai, gadai na gade daram lawm mat ai ngu hpe chyawm a tsawm tup hkrak chyawm n chye ai, seng kata hkan na malu masha hte arung arai hpe mung kam ai hku la sha taw nga ma ai.” nga tsun ai re.
Mare masha yawng ya ten hpyen yen dabang ni hta mai byin ai hku hprawng yen hkawm nga ai ten, mare hta rawng nga ai Myen hpyen dap hte Pyithutsit ni kaw na ya na zawn lagu mya sha taw nga ai mung rai nga ai.
Lai wa sai March praw 7 ya shani Aung Mye (1) hte Shwe Nyaung Pin Myen hpyen dap ni hpe sa htim gap gasat ai hta, Aungmye (1) mare ka-ang na Nlung hka dap shara hpe zing madu kau lu ai hpang Myen hpye dap maga nbungli hte laja lana bai sa gap bun wa ai hta, mung shawa hkra machyi law wa ai majaw, dai shara yawng hpe bai yen kau da ya ai re.
Ya tem dai ginra na mung mare masha ni gaw, tinang man ang ai shara ni de hprawng yen taw nga nna, nkau nawku hpung ni kaw na lajang ai hpyen yen dabang ni hta wa du machyu shingbyi ai ni mung nga taw ai re hpe chye lu ai.
Jam Ga hte Nawng Hkyi mare nawku jawng wang hta wa nga taw nga ai hpyen yen ni hpe, dai shara hta majan bai byin wa na myit tsang ai majaw, Waimaw Mai na camp hte Myitkyina mare kata ni de htawt sit la kau sai re.
Ndai laman dai ginra na hta majan gan zim taw nga nna, Myen hpyen dap hte Pyithutsit dap ni kaw na Mung mare masha ni a nta hkan lagu mya la hkawm taw ai mung rai nga ai.
