Majan laja lana gap gasat hkat taw nga ai lapran, KSCU Dakkasu Jawng Yu Poi Lamang Hpe galaw la lu
Majan laja lana gap gasat hkat taw nga ai lapran, KSCU Dakkasu Jawng (Kachin State Comprehensive University) jawng yu poi lamang hpe Alen Bum jawng hta, March 14 ya shani hkying 10 aten hta galaw wa ai lam chye lu ai.
Dai Jawng Yu hpawng lamang hta Dakasu jawng a Chyawm tari KIC Ningbaw Malai Dukaba Sumlut Gun Maw sa du shagrau wa ai rai nna, laksan saw shaga da ai KIO magam gun ni hte rau NUG na lit nga ai ni sa du shang lawm wa ai lam chye lu ai.
Dai ning na jawng yu ai hta, tsi jawng ma marai (3), Master jawngma marai (3), ningtawn jawng ma marai (9), Bsc marai (10), M.A ဝိဇ္ဇာ marai (104) yawng pawng marai 139 re lam chye lu ai.
Dai Jawng yu shagrau lamang hta, Janmau hkam la sai ramma ni yawng tinang a mungdan hpe prat madang hta hkan nna shagrau shatsaw mat wa na lam hte, 2021 ning kaw na shakut shaja taw nga ai Myen hpyen gumshem lai ladat hpe gasat shamyit kau ai lam hte jet ai federal democracy mungdan gaw de sa wa ai lam hta tinang chye da ai hpaji machye machyang ni hte shang lawm gun hpai sa wa na matu, Dukaba Sumlut Gun Maw kaw na shatsam mungga tsun wa ai lam chye lu ai.
Shawng ningnan lang na KSCU jawng yu hpawng lamang hpe lai wa sai 2023 ning February shata 24 ya shani Laiza Sinpraw majoi hta galaw lai wa sai rai nna, dai shaning hta jawng yu ai jawngma yawng marai 64 re lam chye lu ai.
KSCU jawng hpe lai wa sai 2022 ning September shata 12 ya shani hta KIO, KIA uphkang ginra rai nga ai, Laiza Muklum kata hpaw hpang sharin sa wa ai rai nna, dai ning kaw na KSCU Dakkasu jawng n’ta laksan gaw gap la lu sai re.
