Majan Byin Wa Na Hpe Myit Tsang Ai Kamaing Mung Mare Masha Yawng Mare Kata Kaw Na Hprawng Yen

Kamaing mare makau grup yin hta, Myen hpyen dap hte KIA dap lapran hpyen masa shaja hkat wa ai majaw, Kamaing mare masha yawng hprawng yen taw nga ai lam chye lu ai.

Lai wa sai March 11 ya shana Htoi San Yang Hpungkyi jawng de Myen hpyen dap ni yu wa ai kaw na, hpyen masa shaja hkat hpang wa ai gaw, 14 ya shana sinat mahku nsen ngoi wa ai kaw na, mung mare masha ni hprawng yen pru wa ai re lam, Kamaing ginra masha langai KNG shiga dap de ndai zawn tsun dan wa ai re.

“Mach 11 ya shana Htoi San Yang hpungkyi jawng de Myen ni yu wa na wa nga taw, dai kaw Shanglawt ni mung hkum nga nga na tsun ai, nga taw yang gaw gap na nga na tsun wa, dai kaw na hpyen masa n htuk wa ai majaw, mare masha ni gaw langai hpang langai pya pya rai hprawng yen pru ma ai ga rai nga ai,” nga tsun dan ai re.

Ya na zawn hpyen yen mung shawa ni hprawng pru ma wa ai majaw, March 14 ya jahpawt mare masha ni gadai n pru na hku Myen hpyen dap gan hkum pat wa ai rai tim, n lum hkum pat ai hte mung mare masha ni kaw na tinang chye ai ladat hte laga lam ni hku na hprawng yen pru wa ai rai nga ai.

Ya ten Kamaing mare grup grup Myen hpyen dap wang da let sin taw ai rai nna, dai shara hte deng mi daram sha tsan ai shara hta Wunpawng Mungdan Shanglawt Hpyendap KIA hte PDF dap ni mung hpyen n’gun kaba hte nga taw ai lam chye lu ai.

Myen hpyen dap gaw, Kamaing Byuha kawng hta laknak kaba gap na matu hpyen n’gun 10 jan daram sha tawn da nna, Kamaing mare grup grup hta shara la taw ai lam ginra masha ni matut tsun ai re.

Ya na zawn Myen hpyen dap hte KIA dap lapran hpyen masa shaja hkat taw nga ai majaw, dai mare na mung mare masha ni gaw, Nam Sheng, Hka San, Nam Si En, Mogaung, Namti, Myitkyina ni de jinghku jingyu ni kaw hprawng yen ai ni nga ai zawn, Nam maling kata de hprawng yen ai ni mung nga taw ai lam chye lu ai.

Hpyen yen mung shawa ni hpe KIO Salang kaba ni kaw na mare de bai wa nga na matu tsun ai lam ni nga taw ai rai tim, KIA Hpyen dap maga na gaw hpyen majan masing kaba nga ai majaw, wa na ahkang rai n jaw shi ai lapran kaw mung mare masha ni myit yak taw nga ai lam ndai zawn matut tsun ai re.

“Shanglawt Salang Kaba ni kaw na gaw wa manu anhte dai daram n gap ai, na wa yang nan hte hpe anhte lit n lu la ai shat n lu jaw sha ai nga tsun, ngut na sinat lang ai hpyendap maga de na ni bai rai yang gaw, hkum wa shi mu anhte grain aw gap hkyen ai nga, dai lapran kaw anhte mung shawa ni gaw gade a ga madat ra na re nchye rai na dai hku ung ang nga ga ai,” nga tsun ai re.

Kamaing mare kata hta lai wa sai March 11 ya shani kaw na hpyen masa kahten kamawt wa ai gaw, March 14 ya jahpawt KIA dap maga Drone Laknak kaba hte sa gap gasat wa ai hpang Myen hpyen dap kaw na mung laknak kaba ni hte bai gap bun wa sai re.

Myen hpyen dap maga laknak kaba gap shadam bun wa ai majaw, Kamaing Kawng Ra mare na mung shawa marai 4 hkala hkrum wa sai re.