KIO Ginjaw Ginra Laiza Makau Grupyin Hpe Jahkrit Sharim taw nga ai, Bumre Bum Myen hpyen dap hpe Padang dip Zing Madu
KIO Ginjaw Ginra Laiza makau grup yin hpe jahkrit sharim taw nga ai, Bumre Bum Myen hpyen dap kaba hte lawu Pajau Myen hpyen dap shara hpe KIA dap maga htim shagrawt kau lu sai lam, shawng lam magam gun ni kaw na chye lu ai.
Bumre Bum Myen hpyen dap hpe lai wa sai March praw 7 ya jahpawt kaw na htim gasat taw nga ai gaw, dai ni March 15 ya shani tsep kawp yawng hkra htim shagrawt kau lu sai lam, shawng lam hta nga ai magam gun langai KNG de tsun dan wa ai re.
Dai dap shara hta Myen hpyen dap byuhamu, dap nu 88 na dap up Dukaba ဗိုလ်မှူးချူပ် ကျော်ဇင်အေး dung ai dap shara rai nna, Myen hpyen dap maga Point 771 shamying ai dap shara re lam chye lu ai.
Bumre bum gaw, Laiza makau grup yin na bum yawng hta ahkyak ai dap shara rai nna, dai ginra yawng hpe yu hparan ai Myen hpyen dap up Dukaba dung ai dap shara mung rai nga ai.
Ya htim shagrawt kau lu ai Myen hpyen dap hpe lai wa sai 2012 ning December shata Myen hpyen dap hpyen n-gun kaba nbungli ni hte laja lana wa htim gap gasat ai majaw, KIA dap maga yen kau da ai re.
Dai dap shara hta Myen hpyen dap maga laknak kaba shadun nna, Laiza makau grup yin de jahkring hkring gap shadam bun taw nga ai dap kaba mung rai nga ai.
Matut na rai tim, dai ni March 15 ya shani hta sha Laisin Bum, lawu Pajau Bandula Myen hpyen dap post hpe mung htim shagrawt kau lu sai lam matut chye lu ai.
Laiza makau grup yin na Myen hpyen dap post ni hpe KIA htim gasat taw nga ai ten, Nahpaw Bum Myen hpyen dap kaw na laknak kaba gap shadam bun taw nga ai re.
Lawu Pajau Myen hpyen dap hpe zing madu kau lu ai hpang, Nahpaw Bum Myen hpyen dap shara sha ngam sai lam chye lu ai.
Ya ten Myen hpyen dap maga na mung, shan hte tat sum kau da ai dap shara ni hpe, nbungli hte matut wa htim gap gasat taw nga ai re.
