Kamaing Myen Hpyen Dap Kaw Na Mung Shawa Ni Hpe Hpyen Ninggang Shatai Na Matu Mare Kaw Na Npru Shangun
Kamaing Mare kaba hta majan byin ai lam n nga ai rai tim, Myen hpyen dap kaw na laknak kaba hkrup mara gap shadam bun let, mung mare masha ni yawng hpe hpyen ninggang shatai na matu pru na ahkang n jaw pat hkum da ai lam ginra masha ni kaw na chye lu ai.
Dai hpawt manap jau Kamaing mung mare masha ni gaw, Kamaing mare kata majan byin wa na masa nga ai majaw, tinang shim lum dum ai shara ni de hprawng yen na matu pru wa ai hpe Myen hpyen dap kaw na ahkang n jaw pat hkum wa ai lam ginra masha langai KNG shiga dap de tsun dan wa ai re.
“Ya gaw mung shawa ni lapran, Kamaing Myen hpyen dap hpe Shanglawt nis hang htim gap gasat sana nga shiga a majaw, mung shawa ni hprawng yen na matu hkyen ai hpe Myen hpyen dap hkum pat wa ai rai nga ai, ya gaw gadai hpe mung n pru shangun ai, pru shang lam yawng hpe pat da ai,” nga tsun ai re.
Dai zawn Mung mare masha ni hprawng yen pru wa hkyen ai ten, Kamaing Myen hpyen Byuha kawng kaw na laknak kaba gap shadam bun ai majaw, Kawng Ra mare na hpawmi marai 3 hkala hkrum wa ai re.
Dai hkala hkrum ai mung mare masha ni gaw, Htingnan Jan Magawng Yu Ja asak 63 ning, Slg Nwang Awng Lawt Asak 65 ning Shy Cecelar Ja Tawng ni re lam chye lu ai.
Hkala sawng ai langai hpe Myitkyina tsi rung de htaw sa da nna, laga ngam ai marai 2 hpe gaw Mogaung mung shawa tsi rung hta tsi tsi hkam la taw nga ai lam, garum ningtum hpung na lit nga ai salang langai KNG de ndai zawn tsun wa ai re.
Myen hpyen dap maga mung shawa ni hkrit kajawng hkra laknak kaba gap shadam nna, mare masha ni hpe ya ten gara de mung pru na ahkang n jaw pat hkum da ai re.
Ya ten Kamaing mare makau grup yin hta Myen hpyen dap hte KIA dap lapran hpyen masa shaja hkat taw ai masa rai nna, mung masha yawng myit tsang let nga taw ra ai re.
