Katha Hte Mabeing Lapran Na Nga Oo Mare Hpe Pawng Hpawm Dap Ni Htim Gasat
Sagaing ginra, Katha hte Mabeing lapran na Nga Oo mare na Myen hpyen dap Hk.L.Y 121 dap hpe dai hpawt manap jau hkying 2 daram hta KIA woi awn ai dap hpawm hpung ni sa htim gap gasat wa ai lam chye lu ai.
Dai sa htim gap gasat ai hta, Wunpawng Mungdan Shanglawt Hpyen dap KIA, ginra daju PDF, Jawngma dap ABSDF hte Rahkaing AA dap ni sa htim gap gasat wa ai lam, dai ginra na lit nga ai PDF lit nga ai salang langai KNG de tsun dan wa ai re.
nga tsun a“Dai hpawt manap jau, a kajawng sa htim gap gasat ai, masan gaw sa ai, Myen dap maga sum machyi lam gaw nga na re, rai tim gade daram sum machyi ai ngu hpe chyawm a tsawm tup hkrak n chye lu ai,” nga tsun ai re.
Dai dap shara hpe sa htim gap gasat ai hta, dap shara zing na masing hte sa gap ai n re sha, lagaw gang ai hku na sa gap bun ai masa rai nna, dai hpawt manap sa gap gasat kau da na, bai hting nut mat wa ai masa re nga matut tsun dan ai re.
Ya na zawn Myen hpyen dap sa gap gasat hkrum ai hpang, dai hpawt hkying 8 kaw na hkying 11 daram du hkra, Kaichyan nbungli hte ding yang pyen gayin hkawm taw ai lam chye lu ai.
Dai hpawt sa htim gap gasat ai Myen hpyen dap gaw, lahta sam mung, Nga Oo mare Nmau Hka mahkrai makau hta dap jung tawn ai dap shara rai nna, dai hta hpyen n-gun 200 daram nga ai shara re lam chye lu ai.
Majan byin wa ai majaw, dai ginra na mung shawa ni Katha maga de hprawng yen taw nga ai lam chye lu ai.
Ya ten dai ginra hta hpyen masa matut shaja hkat taw nga nna, majan matut kaba wa mai lam ginra masha ni tsun maram tawn ai re.
