Waimaw Aungmye (2) mare hta Myen hpyen dap ni kaw na mung mare masha ni hpe hpyen ninggang shatai na woi rawng taw nga ai majaw, mung shawa ni malu masha dumhprut wa taw nga ai re.
Dai Hpyen yen mung shawa ni hpe Nawku hpung hte PCG kaw na sa woi la na matu, Myen hpyen dap de ahkang hpyi da ai rai tim, Myen hpyen dap maga ya ten du hkra ahkang n jaw pat hkum da ai re.
March praw 8 ya shani kaw na, Myen hpyen hpung ni dai mare de du shang wa ai hpang, dai shara mayan hta majan laja lana gap gasat hkat wa ai kaw na, mung mare masha ni hpe shing gan de tsep kawp n pru hkawm mat shangun na, Hpungkyi Jawng wang hta mahkawng da ai re.
Ya ten dai hpyen yen ni hpe sa woi shaw la na matu Nawku hpung ningbaw ni hte PCG lit nga ai ni Myen hpyen dap Taimu kaw ahkang hpyi bawng ban jahkrup taw nga ai lam, Sama ginwang na lit nga ai sara langai KNG de ndai zawn tsun wa ai re.
“Hpyen yen ni hpe woi shaw la lu na matu lam gaw tam taw nga ai, Myen hpyen dap ni gaw mare shinggan pru yang gap na nga na tsun ai, dai majaw yawng hpe hpung kyi jawng hta mahkawng da ai, hpyen masa shaja hkat taw nga ai, Nawku hpung ni kaw na jahkrup n lu ai majaw, ya PCG ni hpe ap da ai, Taimu kaw ahkang hpyi ai hpa mahtai rai n lu shi ai nga tsun ai.” nga tsun dan ai re.
Dai ni March 11 ya shani hta, Aung Mye (1), Aung Mye (2) mare makau grup yin ni hta majan matut gap gasat hkat taw nga nna, hpyen yen mung shawa ni hta, malu masha dum hprut wa taw nga ai lam tsun ai re.
“Majan shaloi Hpungkyi jawng wang na hka lawng gap waw kau ai majaw, ya hka grai yak taw nga ai, dai ni n lu pru ai rai yang, hka hte malu masha yak sai, gara kaw na mung n mai sa la ai, dai kaw sha nga taw ra ai, asak kaba sai ni hte ma kaji nkau machyi makaw lam ni mung nga taw ai,” nga tsun ai re.
Dai ginra hta March praw 7 ya shani kaw na majan laja wa ai rai nna, Aung Mye (1) mare na Nlung Hka Pyithutsit dap hpe March 8 ya shani htim gasat zing madu kau ai hpang, Shwe Nyaung Pin, Aung Mye (2) ni hta majan bai laja wa ai rai nga ai.
Dai majan gap gasat ai hta, Myen hpyen dap maga de na, Jet Fighter nbungli, Holicopter, Laknak kaba ni hte sa gap bun wa ai re.
Aung Mye (2) mare hta nta hting-gaw 200 jan nga ai mare kahtawng rai nna, ya ten dai mare na mung shawa yawng hkra pat hkrum taw nga ai rai nga ai.
