Sinbo Hk.L.Y (141) Myen Hpyendap Kaba Hpe KIA Dap Maga Numdaw Kalang Bai Htim Gasat Nga
Myitkyina Manmaw lapran Mali Hka kau na Sin Bo Hk.L.Y (141) Myen hpyen dap kaba hpe Wunpawng Mungdan Shanglawt Hpyendap KIA hte PDF pawng hpawm dap ni dai hpawt manap hkying 7 daram ten kaw na numdaw kalang bai htim gasat taw nga ai lam, dai ginra na mung shawa ni kaw na chye lu ai.
Sinbo Myen hpyen dap hpe KIA KPDF dap ni lai wa sai February 10 ya jahpawt sa htim gap gasat ai hta, nhtoi lahkawng ya daram gap gasat ngut ai hpang, Sinbo mare kaba hpe up madu da nna, Myen hpyen dap hpe wang da ai masa hte, majan hpe gan jahkring da ai kaw na, dai hpawt kaw na numdaw kalang bai htim gasat taw nga ai re lam, dai ginra na mung shawa langai KNG shiga dap de tsun dan wa ai re.
Dai dap shara hpe wang da ai ten, Myen hpyen dap maga laknak kaba ni jahkring hkring gap bun ai lam hte Drone sa du pyen gayin ai lam ni jahkring hkring galaw wa ai lam chye lu ai.
Majan a majaw, Sinbo mung mare masha ni makau grup yin bum yi ni de hprawng yen hkawm taw nga nna, aten galu na wa ai rai yang, malu masha yak hkak wa na masa nga ai lam Sinbo ginra masha ni tsun ai re.
Majan ten laman Myen hpyen dap kaw na nbungli hte sa gap gasat ai majaw, mung shawa si hkala ai lam hte dum nta hkra hten ai lam ni mung law taw nga ai re.
Sinbo mare hta dap jung da ai Myen hpyen dap Hk.L.Y 141 dap gaw lai wa sai shaning 30 ning daram kaw na kring mading dap jung da ai shara rai nna, Mali Hka lam langai hku na sha madung hkawm sa ai mare kaba re.
