Shwegu ginwang, Myohla mare hta dap jung nga ai Myen hpyen byuha dap kaba kaw na hpyen hpung ni pru mat wa sai majaw, dai shara hpe KIA hte PDF dap maga up madu da sai lam chye lu ai.
Dai Myen hpyen dap gaw, Dapnu 88 npu Hk.M.Y (387) dap, Dukaba Win Thu Ra Awng woi awn ai dap shara rai nna, February 22 ya shani Shwegu maga de hprawng htawt sit mat wa sai lam dai ginra na PDF lit nga ai salang langai KNG de tsun dan wa ai re.
“Myohla kaw dung ai dap ni hpe Shwegu de na hpyen n-gun 80 daram hta shim lam la ya nna wa tau la ma ai, jakli, mawdaw ni hte wa tau la ma ai, yawng pru wa sai kun chyawm gaw a tsawm tup hkrak n chye ai, rai tim, Myohla kaw gaw Myen hpyen dap n nga sai,” nga tsun ai re.
Myen hpyen dap ni hprawng shakram kau da ai Myohla Myen hpyen byuha dap hta, KIA hte PDF dap ni dap jung shara jahkrat da lu sai lam matut tsun dan ai re.
Dai shara hta dung ai Myen hpyen dap ni hpe lai wa sai February 19 ya shani KIA dap maga laknak jahkrat na matu, laika hte sadi jaw wa ai hpang, ya na zawn htawt sit yen mat ai rai nga ai.
Ya ten dai ginra hta Myen hpyen dap hpe KIA PDF dap ni htim gasat ai lam hta Myen hpyen dap sum machyi ai lam law taw nga ai majaw, majan nbyin ai dap shara hkan na Myen hpyen dap ni mung htawt sit hprawng yen taw nga ai hpe chye lu ai.
Myen hpyen dap maga ya na zawn dap shara ma hkra hpe tawn kau da ai lam gaw, Jehkam dap shara htim gasat zing kau hkrum ai hpang, Sinbo dap shara hpe mung htim gasat hkrum taw nga ai majaw, n-gun pawng gahkyin ai hku na htawt sit mat ai masa re lam, PDF dap maga tsun maram da ai re.
Myen hpyen dap tawn shakram kau da ai Myohla byuha dap gaw, KIA dapba 8 hte Dung 5 ni a matu ahkyak ai dap shara re lam chye lu ai.
Dai dap shara hta Myen hpyen n-gun 200 daram hte lai wa sai 3 ning daram kaw na dap jung shara jahkrat da ai re lam chye lu ai.
