Sagaing Pinlay Bu muklum kata Myen hpyen dap hte PDF pawng hpawm dap ni lapran majan laja taw nga nna, Myen hpyen dap maga nbungli hte wa gap bun taw ai lam chye lu ai.
February 21 ya jahpawt hkying 4 daram hta Pinlaybu hta dap jung taw nga ai Myen hpyen dap shara ni hpe PDF dap maga sa htim gap gasat ai kaw na majan laja wa ai re lam dai ginra na PDF lit nga salang langai KNG de ndai zawn tsun ai re.
“Majan gaw laja taw nga ding yang re, anhte maga na Pinlaybu Myen hpyen dap kaba hpe sa htim gap gasat taw nga ai, mare kata hta nan re, nbungli hte mung wa gap taw ding yang re.” nga tsun dan ai.
Pinlaybu muklum hpe laja lana htim gasat taw nna, Myen hpyen dap maga na nbungli hte lani mi laman 7 lang da bat wa gap bun kau da ai lam chye lu ai.
Myen hpyen dap rawng taw ai Balik dap, Hpaji jawng makau grup yin ni hta majan laja taw nga ai rai nna, muklum kata nga ai mung shawa ni yawng hprawng yen ma sai lam Kawlin Ginwang NUG asuya hpung na lit nga ai salang langai KNG de matut tsun dan ai re.
Ya ten muklum kata mung shawa gadai n nga sai rai nna, Myen hpyen dap maga hkap shingla gasat taw nga ai majaw, majan matut laja taw nga ai re.
Pinlaybu muklum kata Myen hpyen dap Hk.M.Y 366 hte 370 dap dung lahkawng dap jung da ai lam chye lu ai.
Myen hpyen dap gaw ya ten, PDF pawng hpawm dap maga zing madu da sai shara ni de, hpyen n-gun kaba hte kalang bai htu shadut htim gasat na matu hpyen shamu shamawt ai lam hpe ding yang galaw taw nga ai re.
