Myitkyina Mandalay lam kaba, Hopin, Nan Hkwi mare makau hta, hkrun lam hkawm Express mawdaw kaba kaw na, hkrun lam hkawm La wa-ngan marai 20 jan hpe Myen hpyen dap rim woi mat ai lam ginra masha ni kaw na chye lu ai.
February 21 ya jahpawt hkying 7 daram hta Pinbaw mare daju Myen hpyen dap Hk.M.Y (521) hte Sam Hkyeng Hpyendap SNA hpyen hpung ni gaw, Nan Hkwi mare num shang mahkrai makau hta hkap nna, yu yu lung lung mawdaw yawng hpe hkap jahkring nna, Mawdaw ntsa hta lawm ai la ni hpe madung hkap jahkring woi la taw nga ai nga, Nan Hkwi ginra masha langai KNG shiga dap de tsun dan wa ai re.
“Jahpawt hkying 7 daram kaw na rim taw ma ai, yu yu lung lung yawng hpe jep taw nga ai, marai 20 jan daram rai sam ai, Pinbaw (521) de rim woi mat ai, mare masha ni yawng hkrit na shinggan de pyi n gwi pru mat ai yawng zim re,” nga tsun ai re.
Rim woi hkrum ai ginra masha nkau hpe bai dat ya ai rai tim, laga sumtsan na ni hpe gaw rai n dat ya shi ai lam chye lu ai.
Dai ginra hta Sam Hkyeng SNA dap ni du taw ai shata mi hkawt na ai hpang ya na zawn mung shawa ni hpe rim woi ai lam ni galaw wa ai re nga ginra masha ni matut tsun ai re.
Ya ten Nahkwi mare makau Myen hpyen dap hte Sam Hkyeng SNA dap ni pawng hpawm nna dai ginra hta hpyen shamu shamawt taw nga nna, hpaji jawng ni hta dap jung shara jahkrat ai lam ni galaw taw nga ai lam chye lu ai.
Myen hpyen dap ni kaw na ya na zawn, hkrun lam hkawm mung shawa ni hpe san jep wa ai majaw, mare kata de mung hkan sawk jep wa na hpe myit tsang ai mung mare masha n kau hprawng yen taw nga ai re.
February 21 ya jahpawt hkying 7 hte hkying 9 lapran Myitkyina kaw na yu wa ai mawdaw ni hpe madung hkap san jep nna, dai kaw lawm ai la ni hpe madung garawt jahkrat la taw nga ai majaw, rim hkrum ai hta marai 50 daram du na masa nga ai lam Mawdaw gate la langai matut tsun dan wa ai re.
Rim woi hkrum ai ramma ni hpe Pin Baw mare daju Myen hpyen dap Hk.M.Y 521 dap hta rim woi da ai lam chye lu ai.
