Sama Ginwang Rung Hta Myen Hpyen Dap Malu Masha Htaw Mawdaw Hte Hpyen N-gun 100 Jan Wa Du Shara Jahkrat Nga

Myitkyina Manmaw lam kaba n’tsa na Katsu mare, Sama ginwang rung hta Myen hpyen n-gun 100 jan hte wa du dap jung shara jahkrat taw nga ai lam, chye lu ai.

Dai Myen hpyen hpung ni gaw dai ni February 22 ya shani hkying 10 daram hta, lusha htaw mawdaw kaba 5, Back-hold  kaba 1, hpyen n-gun 100 jan hte shara wa jahkrat nna, shat wa shadu sha taw nga ai nga, ginra masha langai KNG de ndai zawn tsun dan wa ai re.

“Malu masha htaw ai mawdaw kaba gaw 5, Back Hold htaw madaw kaba langai hte arung arai ni wa jahkat na nga taw ai, maram yu yang Sama lam numshe de htu shadut lung wa ai masa re ngu maram lu ai law,” nga tsun ai re.

Dai Myen hpyen hpung ni gaw, sama ginwang rung de shang wa ai ten, sinat gap shangoi nna shang wa ai re lam matut tsundan ai re.

Katsu mare dap jung taw nga ai Myen hpyen dap gaw lai wa sai shata mi jan kaw na, Kagam Bum maga de lu sha wa htaw sa na matu, shakut taw nga ai rai nna, ya ten du hkra rai n lu htaw shalai ai majaw, hpyen n-gun kaba Back Hold ni hte bai shakut wa ai re lam ginra masha ni matut tsun ai re.

Sama lam numshe Myen hpyen dap shara hta KIA hte AA pawng hpawm dap ni wa dung kau ai hpang, Myen hpyen dap ni Kagam bum de lu sha wa htaw sa na matu yak hkak mat sai re.

Ya kalang bai Kagam bum de lu sha htaw shalai lu hkra, hpyen n-gun kaba Back Hold ni hte kalang bai htu shakut wa ai masa re nga ginra masha langai KNG de ndai zawn matut tsun dan wa ai re.

“Shanhte a masa hpe yu yang, Kagam bum de lu sha wa sa lu hkra back hold ni jai lang wa ai masa re ngu mu ai, lai wa sai ten sama lam numshe de du wa shagu sinat ngoi wa wa re, shan hte mung dai de lagaw lam hku na lai na matu yak taw nga ai masa re ngu mu ai, shan hte dai maga de n lu du ai shata hku rai taw sai, ya dai hpawt kaw na bai shamu hpang wa ai ga rai nga ai,” nga tsun ai re.

Lai wa sai shata hkan kaw na Myen hpyen dap gaw, KIA Ginjaw makau ginra de nga ai Myen hpyen dap post shara ni de malu masha htaw shalai yak mat ai majaw, ya na zawn ga lam hku na kalang bai htu shadut wa ai masa re lam ginra masha ni tsun maram tawn ai re.

Ya na zawn Myen hpyen dap maga hpyen shamu shamawt wa ai majaw, dai ginra de hpyen majan bai byin wa na ginra masha ni myit tsang taw nga ai re.

Dabak mare hte deng mi jan sha tsan ai Sama lam numshe hta lai wa sai ten Myen hpyen dap dung ai shara hpe, 2023 July shata Namsan Yang de majan laja wa ai hpang, KIA hte AA dap ni wa du dap jung kau ai shara rai nga ai.