Mungmyit mare kaba hta Majan ten laman na, Bawk laknak kaba si ni seng ya ai lam rai n nga shi ai majaw, dai ginra na mung shawa ni ya ten du hkra mare buga rai n lu wa shi ai re.
Lai wa sai January 10 ya jan kaw na Mungmyit mare hpe KIA woi awn ai PDF pawng hpawm dap ni htim gasat ai ten, Myen hpyen dap maga nbungli hte laja lana wa gap bun nna, mung shawa dum nta law law hten hkrum mat ai zawn, makau grup yin hkan na Bawm hte laknak kaba si ni hpe tam kau ya ai lam gadai n nga ai majaw, mung shawa ni rai n gwi wa taw a lam dai ginra na mung shawa langai KNG de tsun ai re.
“Ya gaw majan byin ai lam gaw n nga sai, rai tim Myen hpyen dap ni mare pru shang lam ni hta grai san jep ai, ngut na mung majan ten laman na bawm laknak si ni gadai n seng ya ai, dai majaw anhte mung shawa ni gaw wa na mung yak, kaning n chye di lapran hta sha jam jau taw nga ai.” nga tsun ai re.
Dai zawn majan laja wa ai majaw, dai ginra na mung shawa mun 2 jan gaw, tinang man ang ai makau grup yin hkan sa hprawng yen taw nga ai kaw na, ya ten du hkra mare jasan ai lam n lu galaw ai majaw, nam maling ni de matut hprawng yen hkawm taw nga ra ai re.
Ya ten Mungmyit mare hta wa dung nga ai Myen hpyen da gaw, laga shara de na htawt wa ai manam dap ni rai nna, mare wan nat jahten ai lam hte mare de shang wa ai amyu shayi ni hpe hkum shan mazut roi rip sat nat ai lam ni mung nga taw ai majaw, mare masha ni grau hkrit tsang taw ai lam tsun ai re.
Dai sha n-ga, mare kata masha wuhpung hte, mung shawa dum nta manu dan ai arung arai ni hpe hkan lagu mya la taw nga ai lam chye lu ai.
Ya ten Mungmyit mare makau grup yin hkan na mung shawa Mun 2 jan gaw, dai ginra na Hpungkyi jawng ni hta mai byin ai hku sa du hprawng yen taw nga nna, dai ni a matu malu masha hte garum ningtum ra ahkyak taw nga ai re.
