Hpakant Lam Ntsa Hkrun Lam Hkawm Mung Shawa Ni Hpe Rim Nna Gumhpraw Hte Bai Shaw La Shangun Taw Nga
Myitkyina Hpakant lam mayan hta Myen hpyen dap kaw na hkrun-lam hkawm mung shawa ni hpe hkap rim la nna, gumhpraw hte bai shaw la shangun taw nga ai lam chye lu ai.
Lai wa sai February 16 ya jahpawt hkying 10 daram hta Mogaung kaw na lung wa ai Mawdaw langai hpe Maran Kahtawng shagyit hta hkap jahkring san jep nna, dai mawdaw kaw lawm wa ai hkrun lam hkawm mung shawa La wa-ngan marai 3 hpe ma ja hkap rim woi la nna gumhpraw hte bai shaw la shangun taw nga ai lam, rim hkrum ai nta masha ni tsun ai re.
“Ndai laman Hpakant lam de lung wa ai ni hpe Maram Kahtawng kaw hkap jahkring hkap jep ai, shan hte yu na asak ram ai ni hpe hkap woi jahkring da ai, Mogaung de woi mat na gumhpraw hte bai shaw la shangun taw nga ai,” nga tsun ai re.
Dai hkap jahkring woi la ai marai 3 gaw February 16 ya jahpawt Mogaung kaw na Hpakant de lung wa ai ten, Maran Kahtawng Myen hpyen shagyit hta hkap rim woi la hkrum ai hpang, Mogaung Myen hpyen dap de woi mat wa nna, marai langai hpe gumhpaw lap sen 30 hte bai shaw la shangun taw ai lam ginra masha ni tsun ai re.
Myen hpyen dap kaw na ya na zawn gumhpraw hte bai shaw la shangun taw ai majaw, dai rim hkrum ai dum nta masha ni ja gumhpraw yak hkak nna, ya ten du hkra n lu shaw la shi taw ai lam tsun ai re.
Ya ten Myen hpyen dap gaw, asak ram ai ramma ni yawng hpyenla lahkawng ning a lahta n galaw n mai tara upade hpe shapraw dat ai hpang, Hpakant lam mayan hta Myen hpyen dap hte Sam Hkyeng Pyithutsit dap ni pawng hpawm nna, mung shawa ni hpe, rim ahkyak la ai lam ni galaw taw nga ai re.
Myitkyina hte Hpakant lam lapran Myen hpyen dap shagyit 5 daram nga ai rai nna, shara shagu hta laja lana san jep taw nga ai re.
