Manje Ginwang, Jehkam Myen Hpyen dap kaba hpe KIA woi awn ai KPDF, AA Pawng hpawm dap maga dai hpawt manap hkying 11 ten daram hta zep zi htim gasat zing madu kau lu sai lam, shawng lam magam gun ni kaw na chye lu ai.
Je Hkam Myen hpyen byuha dap kaba hpe February 16 ya jahpawt manap jau hkying 5 daram ten kaw na htim gasat hpang wa ai gaw, dai ni February 19 ya shani hkying 11 daram hta zing madu kau lu sai lam, dai ginra na magam gun langai KNG de ndai zawn tsun dan wa ai re..
“Zing gaw lu zing sai, anhte bu ni shang na dap jasan ai lam galaw taw nga sai” nga tsun ai re.
Myen hpyen dap maga dai dap shara hpe ntat sum hkra ndai masum ya laman nbungli hte laja lana sa htim gap gasat ai lam hta, mung shawa dum n’ta hte mare masha nkau si hkala hkrum ai lam ni law wa ai re.
Ndai lam hte seng na KIA Shiga magam dap lithkam Dukaba Nhpang Naw Bu hpe san yu yang “Hpa nga rai nna shi ai lo” nga tsun ai re.
February 18 ya laban shani lani mi hta sha Myen hpyen dap maga Jet Fighter nbungli 2 hte 30 lang hkawt dabat sa gap bun wa nna, dai hpawt manap jau hta mung naw matut sa gap bun wa ai lam chye lu ai.
Dai ginra hta lai wa sai shata kaw na Majan byin wa na masa nga ai majaw, mung mare masha nkau tau hkrau kaw na hprawng yen taw sai rai nna, mare dum nta sin let nga taw ai mung shawa nkau ni nawn ai hpungkyi jawng hte Nawku jawng wang ni hta sa hprawng yen taw nga ai re.
Jehkam mare hpe Myen hpyen dap maga nbungli hte laja lana sa gap bun wa ai majaw, dai mare na dum n’ta law law hkra hten mat nna, mung shawa si hkala lam ni mung nga taw ai rai tim, KNG maga a tsawm tup hkrak rai n chye lu shi ai re.
