Mungmyit Hpyen yen mung shawa ni a matu, malu masha hte laga garum ningtum ra ahkyak taw nga ai lam, Lawu ga ginwang, hpyen yen lakawn lanawn hpung ni kaw na chye lu ai.
Dai Hpyen yen mung shawa ni gaw, lai wa sai January 18 ya shani, Mungmyit mare hpe KIA woi awn ai PDF pawng hpawm dap ni sa htim gasat hpang wa ai kaw na hprawng yen pru wa ai hpyen yen mung shawa ni re lam chye lu ai.
Ya ten dai hpyen yen mung shawa ni gaw mare kaba hte Deng 20 daram tsan ai Bung Kalung ginra na nam maling hta sa du hprawng yen taw nga nna, hpyen yen ginsum dum nta gaw gap la lu na matu Sinlam pa (ငါးထပ်သား) Muga hte laga malu masha tsi mawan garum ningtum ra ahkyak taw nga ai lam, Lawu ga ginwang hpyen yen lakawn lanawn lithkam Sara langai KNG de ndai zawn tsun dan wa ai re.
“Anhte Lawu ga ginwang kaw na mai byin dep hkap ai daram gaw sa du yu lakawn nga ga ai, madung gaw malu masha hte tsi mawan ni re ga rai nga ai, ngut na mung ya gaw mai byin ai hku kawa ginsum hte rawng taw nga ma ai, aten galu na matu gaw n manu na re dai majaw aten galu na matu Muga သုံးထပ်သား၊ ငါးထပ်သား ni ra ahkyak taw nga ai” nga tsun dan ai re.
Nam maling kata sa hprawng yen taw nga ai hpyen yen mung shawa ni a matu ya ten, tsi mawan, malu masha hte hpun nba ni hpe Lawu Ga ginwang hpyen yen lakawn lanawn komiti ni kaw na mai byin dang di ai daram garum jaw ya taw nga ai re.
Dai hpyen yen dabang hta, nta htinggaw 50, masha 200 hkawt nga ai hpyen yen dabang rai nna, ma hkum kanu hte asak kaba sai ni a matu tsi mawan ni ra ahkyak taw ai re.
Mungmyit mare mung shawa ni sa du hprawng yen nga ai shara gaw, Mungmyit hte Deng 20 daram tsan ai shara rai nna, mawdaw lam kaba n hkrang ai nam maling de re majaw, Phone Internet line n lu ai sha n-ga, hkrun lam mung yak hkak ai shara re lam chye lu ai.
Dai hpyen yen de malu masha htaw shalai na rai yang, Bung Kalung mare maga de na deng 40 hkawt tsan ai, ga lam hku na sha sa ra ai majaw lanam ta ten rai yang hkawm sa hkawm wa lam yak hkak nna, malu masha htaw shalai la n mai ai majaw, aten galu na matu yak hkak wa mai ai shara re lam chye lu ai re.
Ya ten Mungmyit mare kaba hpe Myen hpyen dap ni matut up madu da ai majaw, hpyen yen mung shawa ni gadai mung mare de n gwi wa ai sha ya na zawn nam maling kata de matut hprawng makoi yen taw nga ai rai nga ai.
Mungmyit mare kaba hpe KIA woi awn ai hte PDF pawng hpawm dap ni nhtoi 10 ya jan htim gasat wa ai hpang, Dap hpawm mayak a majaw, KIA dap maga gan hting nut da ai re.
