Majan gap gasat hkat taw nga ai, Hpakant Lam Lunghpra mare na mung shawa ni gaw Lunghkang Sha-it Yang mare de hprawng yen taw nga ai lam ginra masha ni kaw na chye lu ai.
February 11 ya shani Lunghkang kaw na yu wa ai Myen hpyen hpung ni hpe KIA dap maga hkap shingla gasat ai kaw na majan laja wa ai majaw, dai mare na mung shawa ni hprawng yen ra wa ai rai nga ai.
“Namting hpe htim gasat ai teng kaw na anhte mare makau grup yin de laknak kaba grai ngoi wa ai rai tim mai byin ai hku gawp makoi na lai di ai, ndai laman gaw anhte makau kaw nan gap gasat hkat wa ai majaw n yen yang nmai sai ngu na hprawng yen pru wa ai,” nga tsun ai re.
Myen hpyen dap maga ya ten Namting dap shara hpe bai htim gasat zing madu la lu hkra hpyen n-gun kaba hte htu shadut htim gasat taw nga ai rai nna, laknak kaji kaba ni hte shani shana gap shadam bun nga ai re.
Dai zawn majan nhpan kata, Lung Hpra mare mung shawa ni ya ten Lunghkang Sha-it Yang mare ni hta mai byin ai hku wa du hprawng yen taw nga ai re lam chye lu ai.
Lunghpra mare gaw, Lunghkawng hte Namting mare lapran nga ai mare rai nna, nta hting gaw 30 jan hte masha 150 hkawt nga ai mare kaji re lam chye lu ai.
Kamaing – Hpakant lam lapran na Namting dap hte Hopin – Indaw Gyi – Hpakant lam kaba ntsa na Gwihka Myenhpyen dap ni hpe KIA dap maga htim gasat zing madu kau sai majaw, dai mayan shani shagu hpyen masa shaja hkat taw nga nna, hkrun lam hkawm mung mare masha ni hkawm sa hkawm wa lam hta yak hkak taw nga ai re.
