Manje ginwang, Kaung Lwin mare hta mung shawa patjasan hpung ni kaw na, Kani chyang joi mi hkan manga hte hpawn gumhpraw sen 100 jan lu rim wa ai lam, Patjasan hpung ni kaw na chye lu ai.
February praw 6 ya shani hkying 10 daram hta, Kaung Lwin ninghtawn Law Hkai ja maw hta kani dut mari hpaga galaw nga ai, hpawmi lahkawng a dum nta hpe sa shang jep ai ten, Kani hte kani dut na lu ai gumhpraw Sen latsa jan hpe lu rim wa ai nga, dai ginra na Patjasan ningbaw lit nga ai salang langai KNG shiga dap de tsun dan wa ai re.
“Shiga jaw ai ni nga ai majaw, mung shawa Patjasan hpung ni sa shang jep ai ten, nta kata Kani chyang, Hkat Pung hte hpawn Kani dut da ai gumhpraw sen 100 jan hpe sa mu rim ai. Ka ni dut mari ai hpaw mi yan hpe gaw seng ang ai KIO de ap kau sai,” nga tsun ai re.
Dai Kani dut mari nga ai hpaw mi yan gaw, asak 60 ning hte asak 40 ning ram re ai hpaw mi yan ai re lam chye lu ai.
Ya lu rim ai Hpawmi yan gaw, Law Hkai, Pan Tai, Salat Ja maw ginra hta kani nang hpawm dut garan taw nga ai hpaw mi yan re lam ginra masha ni tsun ai.
Lai wa sai 2023 ning hta mung kani nang hpam dut mari ai ni hpe mung shawa pat jasan hpung ni lu rim nna, KIO lata de ap ya ai lam nga ai rai tim, gumhpraw jaw na bai shaw la shangun ai lam ni nga wa ai lam chye lu ai.
Kaung Lwin Law Hkai ja maw hta nta hting gaw 150 jan nga ai rai nna, shara shagu de na mung shawa ni ja sa htu sha taw ai shara mung rai nga ai
Kaung Lwin ginra gaw, Jinghpaw mung hte Sammung jarit hta nga ai mare rai nna, KIA Dung 12 ginra re lam chye lu ai.
UNODC a 2023 ning sumtang hta Myen mung kata kani hkai shapraw ai shadang laning hte laning grau tsaw jat taw nga ai rai nna, mungkan hta kani hkai shapraw law dik mungdan re lam tsun ndau da ai re.
