Myitkyina Shatapru lawk hta, Mawdaw langai damya mya kashun la hkrum ai hta, gumhpraw sen 80 mung lawm mat wa ai lam, kashun hkrum ai Mawdaw madu kaw na chye lu ai.
January praw 6 ya shana maga hkying 4 daram hta Shatapru Naura pa hta mawdaw jahkring nna, hka yawm gan lu taw nga ai ten, la marai 4 sa wa nna, nhtu sa madi jahkrit nna, mawdaw kashun la mat wa ya ai nga, Mawdaw kashun hkrum ai Shd Zau Li Awng tsun ai re.
“February praw 6 ya shana hkying 4 chyen daram hta byin ai, marai langai gaw ngai hpe nhtu galu hte madi da nna, ngai hte rau lawm wa ai num kasha hpe mung marai langai madi da rai nna, ngam ai marai lahkawng gaw mawdaw de shang na shang gashun mat wa ai.” nga tsun dan ai re.
Kashun hkrum ai mawdaw gaw, Crown dazik a hpraw, 2007 Modern hpan rai nna, dai mawdaw kaw bang da ai gumhpraw Sen 80 hte Lungseng, Mungchying masat, Bank card hte mawdaw gau laisin ni yawng lawm mat ai re.
Dai zawn mawdaw kashun hkrum ai ten makau kaw naura Gawdin pa hta gawdin ginsup taw ai ni mung nga ai rai tim, gadai mung sa garum la ai lam n nga ai nga tsun ai.
Damya mya ai La marai 4 gaw, myiman hta hpa mung n magap da ai, dai hku yu maya hkrang hte sha sa kashun mya mat wa ai re lam chye lu ai.
Jinghpaw mungdaw hta, Myen hpyen dap daru magam zing kau ai hpang, kani lu sha ai masha hte, lagu lagut lam ni grau grau sawng wa ai rai tim, dai hpe ahkyak la ya na masha n nga ai hpe mu lu ai re.
