Majan A Majaw Hpakant De Len La Da Ai Wan Sumri Di Mat

Hpakant Myen hpyen byuha dap kaw na gap dat ai laknak kaba si, Wan shadaw hta wa kapaw hkra ai majaw, ya ten Hpakant muklum kata yawng myi hprap wan si taw nga ai lam chye lu ai.

Namting Myen hpyen dap hpe KIA sa htim gap gasat ai ten, Hpakant Myen hpyen Byuha kawng kaw na laknak kaba shani shagu gap shadam bun ai majaw, Mogawng kaw na Hpakant de len la ai wan sumri di mat nna Hpakant ting wan n lu ai nhtoi 4 ya daram rai sai lam, Lunghkang ginra masha langai KNG de tsun ai re.

“Myi na tim Hpakant gaw laga ginra na hta gunrai manu grau tsaw ai, ya na zawn wan n sa mat yang gaw, laga gun rai manu ni grau tsaw rawt mat sana, ya nga yang hpalap seng hkan sha Phone wan ni hpe sa bang la ra taw nga ai, galoi she bai lu sana kun n chye sai.” nga tsun ai re.

Hpakant ginra hta, Mogaung maga de na Wan len la da ai rai nna, Namting majan hta dai lapran na wan shadaw tsawm ra hten hkra mat ai nga tsun da ai re.

Ya ten wan sumri di mat ai shara hpe, Magwi hte rai htaw sa nna, gram taw ai lam ni mung nga taw sai lam chye lu ai.

Namting Myen hpyen dap hpe KIA htim gasat zing madu kau ai hpang, Myitkyian Hpakant lam kaba hpe jahpawt maga sha lai na ahkang jaw da ai rai nna, shani ka-ang hkying 12 a hpang lai na ahkang n jaw sai lam chye lu ai.

Shana maga lai na ahkang n jaw pat hkum kau ai lam gaw, Hpakant Myen hpyen Byuha dap na laknak kaba hte shani shagu gap shadam taw nga ai majaw, mung shawa ni lai ang ai ten wa hkrat hkra na hpe tsang ai majaw, hkum pat da ai re nga, dai kaw na lit nga ai ni tsun ai re.