Hpakan Gwihka Myen hpyen dap hpe zing ngut sai raitim, shara jasan ai lam hte bawm jasan ai lam ni n ngut shi ai majaw, hpyenyen mung shawa ni mare de n mai wa shi ai lam chye lu ai re.
Majan byin ai ten, rai n kapaw shi ai laknak kaba ni hte hkam da ai bawm ni, nta sun wang hte mare shinggan ni hta rai n lu jasan shi ai majaw, ya ten du hkra mare masha gadai hpe mung mare de shang na ahkang rai n jaw shi ai lam, dai ginra na lit nga ai Sara langai KNG de tsun ai re.
“Ya madung gaw n’ta sun wang hkang mung laknak kaba si wa hkrat ai lam ni nga ai, Mare shingnawm hkawn mung bawm ni grai naw lup da ai, dai ni hpe a tsawm rai n lu seng shi ai majaw, wa na ahkang rai n jaw shi ai ga rai nga ai, ngut na mung laknak kaba ni jahkring hkring naw gap bun taw nga ai gaw,” nga tsun dan ai re.
Laiwa sai January praw 6 ya shani kaw nna, Gwihka myen hpyendap hpe Wunpawng mungdan shanglawt hpyendap KIA kaw nna, htim gasat hpang wa ai gaw January 20 ya jahpawt maga, Gwihka myen hpyendap hpe zepzi zing madu kau lu sai re.
Majan a majaw, Ginra mung shawa hkying 5 jan Sengtawng Nawku jawng, Mawshan hpunggyi jawng hte Hpakan mare kaba hkan hprawng koi yen hkawm nga ra ai re.
Ya ten dai ginra na Myen hpyendap balik dap yawng hpe jasan kau lu sai rai tim, mare shinggan hte nta sun wang n kau hta rai n lu jasan shi ai rai nna, Hpakant Myen hpyen Byuha dap na laknak kaba gap shadam bun ai lam ni mung naw nga taw ai re.
Dai majaw mung mare masha ni hpe mare kata gadai rai n wa shi na lam hte lama masa htuk na mai wa ai shani lit nga ai ni hku na tsun shana wa na re lam ginra masha ni hpe tsun da ai re.
Nhtoi 20 ya ram na ai Gwihka majan hta Myen hpyendap Hk.L.Y (402) dap hte Balik dap ni hpe KIA kaw nna, gasat zing kau sai rai nna, lahkawng maga si hkala ai lam law wa ai re.
