Hpakant lam ntsa na Ma-U Pin mare hpe Myen hpyen dap ni wan sa nat kau ya nna, dai mare na Hpung-up Sara hte hpawn mung shawa marai 3 hpe rim woi mat ai lam chye lu ai.
February praw 7 ya jahpawt hkying 10 hte 11 lapran, Kamaing Myen hpyen dap hte Sam Hkyeng Pyithutsit dap ni pawng hpawm nna, sa nat kau da ya ai re lam ginra masha langai KNG de ndai zawn tsun wa ai re.
“Ma-U Pin de lung wa na, wa shang gap ai ni gaw, Kamaing byuha kawng kaw na Hk.M.Y (120) ni hte Sam Hkyeng ni hte pawng hpawm na sa gap nat ai re. Wan hkru ai kaw lawm mat ai mawdaw gaw mare salang wa na re” nga tsun ai.
Myen hpyen dap hte Sam Hkyeng Pyithutsit dap kaw na Ma-U Pin hta nga ai mung shawa nta yawng nat kau ya ai ra nna, mare numshang mahkrai makau na nta 2 sha ngam ai lam chye lu ai.
Ma-U Pin mare hta nta hitng gaw 15 daram sha nga ai mare kasha rai nna, ya ten mare ting wan nat hkrum mat sai majaw, tinang man ang ai shara ni de hprawng yen hkawm taw nga ai re.
Dai mare hpe wan nat kau ai hpang, dai mare na Hpung Up Sara hte hpawn mung shawa marai 3 hpe Myen hpyen dap ni rim woi mat ai rai nna, dai ni hpe bai sa woi lu shaw hkra PCG maga de garum hpyi da ai lam ginra masha langai ndai zawn tsun ai re.
“Dai mare kaw na Hpung Up Sara hte hpawn mung shawa marai 3 hpe Kamaing de rim woi mat ai, dai ni hpe bai shaw la lu na matu PCG de phone set garum hpyi da ai, ya Nawku hpung a kanu kawa ni hte mare myitsu kanu kawa ni sa shaw woi la na hku re” nga matut tsun wa ai re.
Ya ten Hpakant lam mayan hta Myen hpyen dap hte KIA dap lapran hpyen masa shaja hkat taw nga ai rai nna, lai wa sai bat Namting mare hpe KIA dap htim gasat zing madu ai hta Myen hpyen dap maga sum machyi lam law wa ai majaw, ya na zawn mung shawa nta hpe zing ri wa ai masa re lam ginra masha ni tsun maram da ai re.
Matut na rai tim, Ma U Pin mare gaw Wunpawng Mungdan Shanglawt Hpyen dap KIA hte matut mahkai nga ai mare re ngu mara shagun let sa nat kau ya ai re nga tsun ai re.
Hpakant lam Namting mare Myen hpyen dap hpe KIA dap maga February praw 2 ya shani htim gasat zing madu kau ai re.
