Kamaing hte Hpakant lapran Namting Myen hpyen dap hpe KIA dap maga February praw 3 ya shani ka-ang ten hta htim gasat zing kau lu sai re.
Dai htim gasat zing madu ai hta Myen hpyen la si taw ai marai 6, Drone 1, Drone Bawm hte lagak laknak machyu pala alaw alam pangdang dip zing madu la lu wa ai re.
Namting Myen hpyen dap hpe shata mi hkawt htu shadut htim gasat wa ai rai nna, dai shara hpe htim gasat ai hta KIA magam gun langai share shagan hkrat sum wa nna, nkau hkala hkrum ai ni mung nga ai lam, shawng lam magam gun ni kaw na chye lu ai.
“Namting hpe February 3 ya shani ka-ang yawng zep zi zing kau sai, zing ngut ai hpang ginra jasan galaw ai kaw Myen hpyen mang 6 mu ai, ngut na laga laknak machyu pala tsawm ra mi padang dip zing la lu ai.” KNG de tsun ai re.
Dai dap shara hpe htim gasat ai hta, Myen hpyen dap maga nbungli hte laja lana wa gap bun nna, Hpakant Myen hpyen dap kaw na laknak kaba ni hte mung gap garum bun wa ai re lam chye lu ai.
Namting Myen hpyen dap kaw na hprawng gale pru wa ai hpyen hpung ni Namya maga de hprawng yu mat ai lam matut chye lu ai re.
Ya ten dai ginra na mung shawa ni tinang man ang ai shara de hprawng yen taw nga nna, dai makau grup yin ni hta Myen hpyen dap nbungli bawm wa jahkrat ai lam ni matut byin nga ai hpe chye lu ai.
Myitkyina – Hpakant de lung ai lam kaba lahkawng maga hpe KIA dap maga htim gasat zing madu kau lu sai rai nga ai.
Hpakant Gwihka Myen hpyen dap hpe KIA dap maga January 20 ya shani htim gasat zing madu kau lu sai re.
