Danggu Tang Pyithutsit Dap Shagyit Ningnan Jahkrat Nna Mung Shawa Hpe San Jep Nga
Putao mare kaba pru shang lam ni hta Danggu Tang Pyithutsit dap ni shagyit jahkrat let, hkawm sa hkawm wa Mung shawa ni hpe san jep taw nga ai lam ginra masha ni kaw na chye lu ai.
Shagyit jahkrat da ai shara gaw, Putao Jubeli lawk hte Nbungli Pa lawk lapran na Naw Mung, Machyang Baw sa lam ni hta dap jung shara jahkrat da nna, ndai lapran kaw na ladu lai san jep taw nga ai lam, dai ginra na mung shawa langai KNG de ndai zawn tsun dan ai re.
“Jubeli hte Nbungli Pa lawk lapran mung shawa ni nga ai kaw shagyit jahkrat ai ngu gaw n byin ging ai re, shan hte shagyit jahkrat dat ai hte mung shawa ni gaw shawoi na zawn wang lu wang lang n lu hkawm sai, laknak kaba sa gap bun ai zawn re ni byin yang mung, Mung shawa ni kaw hkra wa na rai nga ai, dai majaw mung shawa ni gaw myit tsang taw ai” nga tsun ai re.
Pyithutsi dap shara hte shagyit jahkrat na rai yang, mung shawa hte tsan ai mare shinggan ni hta jahkrat ya na hpe mung shawa ni myit mada ra sharawng nga ai re.
Ya hpaw da ai shagyit ni hta hkawm sa hkawm wa ai mung shawa ni yawng hpe shiga jaw na hte lak lai ai lam ni pru wa yang, sa tang madun na matu tsun da ai lam nga ai hpe chye lu ai.
Ya ten kring mading shara jahkrat na matu hkyen taw nga ai shara gaw, Nbungli pa lawk hte Jubeli lawk lapran hta rai nna, dai shara hta gaduk nhkun, kawa ginsum ni shagreng taw nga ai re.
Danggu Tang Pyithutsit dap ni kaw na ya na zawn dap shara hte shagyit ni jahkrat wa ai a ntsa ginra masha ni myit tsang taw nga ai re.
Ya ten dai ginra ni hta Pyithutsit hpyen lahkawn ai lam ni ja ja galaw taw nga nna, hkrun lam hkawm mung shawa ni hpe san jep ai lam ding yang galaw nga ai re.
