Waimaw Aung Mye Thit mare Myen hpyen dap npu Lhovo Pyithutsit hpaw shakut taw nga ai Latsa Hkawng Dau nta hpe KIA Dung 3 ni, Bawm sa kapaw bun ai hta, nta madu wa hte hpawn, Pyithutsit marai 5 hkala hkrum wa ai lam ginra masha ni kaw na chye lu ai.
Aung Mye Thit mare lawk 5 na Pyithutsit n-gun 20 daram hte shim lam la na nga taw ai Latsa Hkawng Dau a n’ta hpe January 28 ya shana hkying 11 daram hta sa gasat wa ai rai nga ai.
Dai nta sa gasat hkrum ai hta, Latsa Hkawng Dau hte hpawn shi kasha, Pyithutsit hpyen la yawng marai 5 hkala hkrum wa nna, Myitkyina Hpyen tsi rung de htaw sa da ai lam dai ginra na mung shawa langai KNG shiga dap de tsun ai re.
“Shana hkying 11 daram hta kapaw wa ai, dai kapaw ai hpang mare salang hte Shwe Min Pyithutsit hpung ni sa yu ai n’ta numgaw baw mat ai, ngut na marai 5 daram gaw hkala sam ai, makau grup yin hkan mung hten ai,” nga tsun ai re.
Pyithutsit ningbaw Latsa Hkawng Dau gaw lagaw maga mi de hkala sawng wa nna, kasha ngu na wa gaw myi man ting hkra hkala ai lam chye lu ai.
Ya ten Latsa Hkawng Dau a nta hpe U Shwe Min Pyithutsit dap ni sa jasan jaseng ya taw nna, shim lam ni mung la ya taw ai nga tsun ai re.
Dai shana hta nta kaw masha marai 20 daram pyaw poi galaw taw nga ai ten, KIA dap maga sa htim gasat wa ai re lam matut chye lu ai.
Ya na zawn Latsa Hkawng Dau gap gasat hkrum ai lam gaw, lai wa sai shaning htum ram kaw na, Waimaw ginra hta U Shwe Min hte rau Pyithutsit hpaw shakut taw nga ai wa re majaw, ya na zawn gap gasat hkrum ai re nga, ginra masha langai ndai zawn matut tsun maram tawn ai re.
“Madung gaw Shwe Min wa hte pawng na mung shawa ni hpe rim ahkyak la let Pyithutsit hpaw shakut taw ai majaw gap hkrum ai ga rai nga ai, Shanglawt maga mung yu taw ai na sai gaw, dai majaw rai na re,” nga tsun ai re.
Slg Latsa Hkawng Dau gaw Waimaw ginra hta Slg Shwe Min hte pawng hpawm nna, mung shawa ni hpe nta di di hpyen lahkawn ai lam ni galaw nga nna, gumhpraw hte bai shaw la shangun ai lam ni galaw taw nga ai re.
Ya gasat hkrum ai Latsa Hkawng Dau hpe mung shawa maga madi shadaw ai lam hpa n nga ai rai tim, shi hkum shi Lhovo Pyithutsit nga nna, hpaw shakut taw ai rai nna, Shwe Min Pyithutsit hpung ni shim lam la ya taw ai mung rai nga ai.
Latsa Hkawng Dau kaw na ya na zawn Lhovo myusha mying lang let Pyithutsit hpaw ai lam n galaw na matu, Lhovo htunghking maga tsun shadum da ai re.