Hpyen masa lam hta ahkyak ai, Dalu Myen hpyen dap shara hpe KIA Dung 14 ni htim gasat zing madu kau lu ai nga, Dukaba Nhpang Naw Bu tsun ai re.
Hugawng Danai, Dalu Myen hpyen dap Hk.L.Y (86) shara hpe KIA dap ni, January 27 ya shani kaw na htim gasat wa ai gaw January 28 ya shana maga hkying (1:00) daram hta zep zi htim gasat zing madu kau lu sai lam tsun ai re.
Dai dap shara gaw, Jinghpaw Mung hte Sagaing jarit, Naga hte ni kahtep ai jarit shara rai nna, Sagaing maga de na Danai hka lam hku Jinghpaw mung de shang wa mai ai lam kaba rai nna, dai ginra na jamaw kaba ni hta hkawn kang hta sha let, kring mading rai dap jung da ai shara re lam Dukaba Naw Bu ndai zawn tsun ai re.
“Jinghpaw Mung hte Sagaing Jarit, Naga ginra hte ni kahtep ai shara re le, dai lam hku na Jinghpaw mung hte Naga ginra ni de Hka Lam hku na shang wa mai ai, ngut na mung dai shara gaw Ja Maw ginra re, dai majaw ahkyak ai dap shara re ngu mai tsun ai le,” nga tsun ai re.
Dalu Myen hpyen dap shara hpe htim gasat ai hta, Myen hpyen dap maga, Jet Fighter nbungli hte wa htim gap gasat wa ai lam nga ai re hpe chye lu ai.
Ya na zawn kring mading dap jung da ai Myen hpyen dap hpe KIA Dapba 2 Dung 14 hte PDF pawng hpawm dap ni htim gasat kau ai rai nna, dai dap shara na laknak machyu pala padang dip zing la lu wa ai re.
Dai Myen hpyen dap shara hpe lai wa sai ten ni hta mung KIA dap maga sa htim gap gasat ai lam ni nga wa ai shara re.
Ya htim gasat zing madu kau ai shara de, Hka lam hku na sha mai sa ai shara rai nna, Myen hpyen dap maga, hkalam pat ai lam ni jahkring hkring galaw nga ai majaw, dai ginra na mung shawa ni malu masha hte jaksau yak hkak ai lam ni byin lai wa sai re.
Dalu Myen hpyen dap hpe htim gasat zing kau ai hpang, ya ten dai ginra makau grup yin ni hta hpyen masa matut shaja hkat taw nga ai re.
