Shaning na na kring mading dap jung shara jahkrat da ai, Namsheng mare na Myen hpyen dap shara hpe majan byin ai lam n nga ai sha, Myen hpyen dap maga tawn yen kau da ai nga ginra masha ni tsun ai re.
Namsheng mare hta hpyen n-gun 50 daram hte dap jung tawn ai Myen hpyen hpung ni gaw January 27 ya shana dai dap shara kaw na pru mat wa ai hpang, January 28 ya shani KIA dap maga wan nat jahten kau ma ya ai nga, dai ginra na mung shawa langai KNG de tsun dan wa ai re.
“Hpa majan mung n byin ai, Myen hpyen dap ni shana pru mat wa ma ai, ngai yu yang Kamaing dap de wa pawng mat sam ai, ya gaw shawnglawt hte PDF dap ni shara jasan ai lam galaw nna, dap shara nkau hpe mung wan nat kau ai,” nga tsun dan ai re.
Dai mare hta dap jung ai Myen hpyen dap ni gaw, Hk.M.Y (144) dap ni rai nna, hpyen n-gun 50 daram nga ai rai nna, dai ni yawng Kamaing Myen hpyen dap de wa pawng hpawm mat ai lam chye lu ai.
Namshem Myen hpyen dap dawm mat wa ai lam hte seng nna, KIA shiga magam dap lithkam Dukaba Nhpang Naw Bu ndai zawn matut tsun maram ai re.
“Ya ten Myen hpyen dap gaw shara shagu hta hpyen majan sum machyi taw nga ai sha n ga, masha n-gun yawm wa ai majaw, loi kaji ai dap shara ni hkan na hpyen n-gun ni hpe dap kaba de wa pawng hpawm mat ai masa re ngu mu mada ai” nga tsun ai re.
Lai wa sai ten, dai dap shara hpe KIA dap maga jahkring hkring sa htim gap gasat ai lam ni nga ai majaw, matut na bai sa gap ai rai yang, Nam Sheng Mare hpe wan nat kau ya na nga, Nawku hpung ningbaw hte mare salang ni hpe tsun jahkrit da ai re.
Nam Sheng Myen hpyen dap ni Kamaing dap de wa pawng hpawm mat ai hpang, Kamaing mare hta Myen hpyen dap hte Pyithutsit dap ni pawng hpawm nna, mare pru shang lam ni yawng hta ladu lai san jep ai lam ni galaw taw nga ai re.
Ya ten Kamaing Myen hpyen dap gaw majan byin ai lam n nga ai rai tim, laknak kaba hkrup mara gap shadam bun ai majaw, mung shawa hkala hkrum ai lam ni mung nga taw ai re.
