Wunpawng Mungdan Shanglawt Hpyen dap KIA woi awn ai hte, PDF pawng hpawm dap ni htim gasat zing madu da ai Kawlin mare kaba hpe Myen hpyen dap maga laknak kaba gap shadam bun ding yang re lam, ginra masha ni kaw na chye lu ai.
Kawlin mare hte Deng 6 daram sha tsan ai Wun Too Hk.M.Y 120 laknak kaba dap kaw na gap shadam bun taw nga ai hta, Mung shawa ni nga ai shara de lata nna, da sang gap bun taw nga ai nga, dai ginra na mung shawa langai KNG shiga dap de tsun dan wa ai re.
“Shani shagu ngu na gap bun ai, ya mung shanhte n shadu yang n shadu ai hku gap bun taw nga ai, ndai laman mung shawa si hkala ai chyawm nau n nga sai, mung shawa nta gaw hkra hten ding yang re, shanhte gaw mung shawa ni hpawng chyawm ai shara de hkra lata na gap bun ai,” nga tsun dan ai re.
Wun Too Myen hpyen dap kaw na, laknak kaba shani shagu gap bun taw nga nna, mung mare masha ni dai mare hta n gwi nga mat hkra gap jahkrit taw ai re nga, ginra masha langai matut tsun maram wa ai re.
Myen hpyen dap maga dai zawn laknak kaba ni hte gap shadam bun ai majaw, n dai laman mung shawa marai 10 jan asak si sum wa nna, nta yawm htum 5 daram wan hkru hten mat ai lam chye lu ai.
Myen hpyen dap maga ya na zawn, laknak kaba hte shani shagu gap bun taw ai majaw, mung shawa ni kaw na mung laknak kaba ni hpe makawp maga lu na ga n hkun gaduk ni hpe htu shagreng da na matu, NUG maga tsun da ai lam nga ai hpe chye lu ai.
Ya na zawn mung shawa ni hpawng chyawm ai shara ni de shading nna, gap bun bun re majaw, mung shawa ni mung masha hpawng chyawm ai lam n galaw na matu tsun sadi jaw da ai re.
Kawlin mare kaba hpe lai wa sai 2023 ning November praw 6 ya shani KIA woi awn ai hte PDF pawng hpawm dap maga htim gasat zing madu kau lu ai mare kaba rai nga ai.