Jinghpaw Sagaing Jarit, Katha, Moe Thar Lay PDF dap ni Myen hpyen dap hpe sa htim gap gasat na bai n htang wa ai kaw Myen hpyen dap hte hkrum ai majaw, PDF magam gun marai 3 hkap rim zingri sat hkrum ai lam chye lu ai.
December 21 ya jahpawt hkying 6 daram hta, Katha Myen hpyen dap hpe Drone hte sa gap bun kau da nna, bai n htang wa ai PDF magam gun marai 3 gaw Mingalar Thuhka mare hta, Myen hpyen shawng lam hpung ni hte hkrum nna, sat hkrum ai re nga, dai ginra na PDF lit nga ai ni KNG shiga dap de ndai zawn tsun dan ai re.
“Shanhte gaw Myo kata de Drone hte Myen hpyen dap hpe sa gap bun ai, dai kaw na bai wa ai ten, Myen hpyen hpung hte hkrum, dat kaw nan pat hkrum mat ai, dai kaw nan sat hkrum mat ai, marai 3 re ga rai nga ai,” nga tsun dan ai re.
Dai masum hpe zingri sat nna, kan n tsa hta mung ကျားဘီလူးစစ်ကြောင်း nga nna, ka kau da ai lam chye lu ai.
Sat hkrum ai marai 3 gaw, Moe Thar Lay PDF dap a Drone lang ai wuhpung ni rai nna, asak 20 ning daram re ramma ni re lam chye lu ai.
Dai Myen hpyen hpung ni gaw, dai shani jang nan Katha mare de bai shang mat ai lam chye lu ai.
Katha mare kaba makau grup yin hta, ndai laman hpyen masa shaja hkat taw nga nna, Drone hte sa lagu htim gasai ai lam ni jahkring hkring galaw nga ai lam PDF dap maga tsun ai re.
