Hpakant, Sengtawng ninghtawn Mawmung mare ga shingbut ru bang ai hka lawng na, hkumpup ntsin ni mare de lwi hkrat wa taw nga ai lam, ginra masha ni tsun ai re.
Dai zawn hkum put n tsin ni lwi hkrat wa ai majaw, Mawmung buga nawku jawng wang hte laga shara ni hkan hkum pup n tsin ni hkrai byin ma taw ai sha n ga, dai hkumpup nawng gyi ru hkrat wa na hpe ginra masha ni myit tsang ai lam n dai zawn tsun ai re.
“Mana de kaw na hkumpup n tsin lwi hkrat taw nga ai, mare nawku jawng hte hpaji jawng lam ni hkan hkumpup nawng tai ma sai, ya gaw dai hku lwi hkrat taw ai sha naw re, dai nawng gyi ru hkrat wa yang n loi ai,” nga tsun dan ai re.
Lama hkumpup nawng kaba dai gyi ru hkrat wa yang, Mawmung mare nta yawng hpe galup kau wa mai ai majaw, ginra masha ni myit tsang nga ma ai re.
Ya na zawn myit tsang ra taw nga ai hkumpup nawng kaba dai hpe, lit nga ai ni kaw na a tsawm jasan kau ya na hpe ginra masha ni hpyi shawn nga ma ai re.
Dai hkumpup nawng kaba gaw, Mawmung mare baw Pe (600) daram tsaw ai ga shingbut nawng kaba re lam chye lu ai.
Dai shara hta lai wa sai October shata kaw na, Mana Maw na lungseng htu company ni wa kabai ai ga shingbut ni rai nna, gara Company re ngu hpe a tsawm tup hkrak n chye lu ai re.
Mawmung mare hta nta htinggaw hkying mi jan nga ai rai nna, lungseng htu masha mun mi jan nga ai mare kahtawng kaba langai re lam chye lu ai.
Dai ning laman Hpakant ginra hta ga shingbut gyi ru ai majaw, masha latsa makau grup yin ram si hkrum sai re lam, garum ningtum hpung ni kaw na chye lu ai re.
