Sagaing Hummalin ginwang, Shwe Pyi Aye mare kaba hpe PDF pawng hpawm dap ni n htoi lahkawng ya laman htim gasat zing madu kau lu ai lam chye lu ai.
November 21 ya jahpawt kaw nna htim gasat hpang wa ai gaw, November 23 ya shana maga de htim gasat zing madu kau lu sai lam, Hummalin PDF dap maga, n dau da ai re.
“Shwepyi Aye mare kaba hta Myen hpyen dap shara masum nga ai, dai dap shara hta Myen hpyen dap hte Sam Hkyeng SNA ni pawng hpawm nna, nga ai, dai shara masum hte hpe htim gasat zing kau lau sai,” nga dai ginra na PDF lit nga ai ni tsun ai re.
Dai dap shara hpe htim gasat zing ai hta, Myen hpyen dap Helicopter hte 10 lang jan wa htim gap gasat ai sha n ga, Jet nbungli hte mung bawm kaba wa jahkrat bun ai lam nga ai hpe chye lu ai.
Shwepyi Aye mare kaba hpe htim gasat zing ai hta, laknak machyu pala alaw alam lu zing madu la nna, Myen hpyen la marai 10 jan hpe mung jahkrung lu rim da ai lam ndau da ai re.
Shwepyi Aye Myen hpyen dap shara masum hpe htim gasat zing ai hta, Sagaing laksan dap Nawng, Hkan Ti dap dung 1,2, hte ပကဖ၊ ပလဖ ni shang lawm ni htim gasat zing madu wa ai re.
Shwepyi Aye mare kaba hpe lai wa sai 2023 February praw 1 ya shani hta mung kalang htim gasat zing madu kau sai rai nna, Myen hpyen dap maga hka lam, nbung lam ni hte laja lana bai wa htim gap gasat ai majaw, n htoi masum ya hte bai tat sum kau wa ai re.
Ya htim gasat zing ai Shwepyi Aye gaw, Sagaing hte Jinghpaw mung jarit, Hummalin ginwang Uru hka kau hta nga ai mare kaba langai mung rai nga ai.
Ya ten dai shara hpe Myen hpyen dap maga, nbungli hte wa gap gasat ai lam ni naw nga taw nna, hpyen masa matut shaja hkat taw nga ai re.
