Majan ShigaShiga

Hpakant Ayemyartharyar mare kaw Myen Hpyen Dap Shagyit Langai Jahkrat Nga

Hpakant Ayemyartharyar mare kaw shagyit dung hkyen taw ai Myen Hpyen dap hte Pyithutsit hpyen hpung ni hpe KIA PDF Drone bawm sa jahkrat bun lai wa ai lam chye lu ai.

Ayemyartharya mare, Sanchyoi, Sharaw Hka, Hpakant lam mazup shara makau kaw November 16 ya shani kaw na gate jahkrat wa ai majaw KIA PDF maga November 17 shani ka-ang hkying 12 aten daram kaw Drone bawm sa jahkrat bun wa ai lam chye lu ai.

Drone bawm jahkrat hkrum ai hpang, dai kaw nga ai Myen hpyen ni gaw makau grup yi ni de sinat gap dumbre bun ngut ai hpang, lai sa lai wa mung mare masha ni hpe hkap san jep ai lam ni galaw wa ai hpe chye lu ai.

Mani shani ka-ang Drone bawm sa jahkrat bun ai masa lam hte seng na ginra masha langai KNG shiga de n dai zawn tsun dan ai re.

“Sanchyoi, Sharaw Hka, Hpakant lam mazup shara Ayemyartharyar mare kaw November 16 ya shani kaw na gate jahkrat taw ma ai, anhte maga na ni Mani shani ka-ang kaw Drone bawm sa jahkrat bun, drone bawm jahkrat bun hkrum ai hpang gaw, makau grup yin de laknak kaji kaba gap dumbre bun wa ma ai, mung shawa si hkala lam gaw a tsawm n chye shi ai ga rai nga ai,” nga tsun ai re.

Myen Hpyen Dap hte Pyithutsit Dap maga na gaw, dai ni mung dai shara kaw zaibru buri ni jahkrat nna, Banger kadut ni galaw taw ai lam matut chye lu ai re.

KIA maga Drone bawm sa jahkrat bun wa ai hpang, dai kaw nga taw ai Myen hpyen la hte Pyithutsit hpyen hpung ni makau grup yin ni de sinak gap shadam bun wa ai lam nga ai hpe matut chye lu ai.

Dai zawn Sinat gap shadam bun ngut ai hpang, lai sa lai wa mung mare masha ni hpe ladu lai san jep ai lam ni bai galaw wa ai nga tsun ai re.

Myen Hpyen dap maga na gaw, Hpakant ginra kaw Shinggyit shara ni grau grau jahkrat wa nna, hkawm sa hkawm wa mung mare masha ni hpe san jep ai lam ni galaw taw nga ai re.

Lai wa sai October 7 ya shani hta mung Myen hpyendap pawng hpawm rung hpe KIA Drone bawm sa jahkrat bun ai majaw, marai 3 si hkala hkrum lai wa sai re.

Related Articles

Back to top button