Dawhpum Yang, Myen hpyen dap Hk.L.Y (142) dap gaw KBC Nawku Jawng wang de, laknak kaba gap bun ai majaw, mung masha marai 3 hkala hkrum wa ai lam chye lu ai.
November praw 5 ya shani Dawhpum Yang mare hta dap jung nga ai Myen hpyen dap ni kaw na, Nawku jawng wang de, da sang sha ang nna, laknak kaba gap bun ai majaw, Nawku jawng wang hta nga ai hpung sara langai hte, hpungtau langai, hpung salang langai, hkala hkrum wa ai lam chye lu ai.
“Dawhpum Yang Myen hpyen dap hpe sa gap ya ai majaw she nrai i? Nawku jawng de da sang sha-ang na bai gap bun ai, nawku jawng wang kaw nga taw ai marai 3 hkala ai ga rai nga ai,” nga buga masha langai KNG de tsun ai re.
Hkala hkrum ai ni gaw, Sara Maikung Hkun Nawng, Hpt Maru Kai Ling, Slg Labang Naw Bawk ni hkra hkala ai rai nna, ya ten tsi tsi hkam la taw nga ai lam chye lu ai.
Myen hpyen dap ni ndai laman Laiza makau grup yin de, laknak kaba ding yang gap shadam bun taw ai zawn, KIA dap maga na mung, Myen hpyen dap shara ni hpe Drone hte sa jahkrat bun ai lam ni galaw ai hta, Hangkai Bum hte Dawhpum Yang Myen hpyen dap hta wa hkrat ang ai majaw, Myen hpyen dap maga sum machyi lam law wa ai hpe chye lu ai.
