Munggu ginra yawng hpe, Kokang MNDAA dap woi awn ai hte dingdung daw daphpawm hpung ni, November 7 ya shani, tsep kawp htim gasat zing madu kau sai lam, ndau da ai re.
Munggu ginra hpe nhtoi 3 ya laman hte htim gasat zing madu kau ai rai nna, hpri gang mawdaw hte hpawn kaga hpyen lang arung arai alaw alam mung zing madu la lu ai re lam, dai ginra na mung mare masha ni tsun ai re.
November praw 5 ya shana, Munggu Myen hpyen byuha dap hpe, Kokang dap maga dap maga de na Drone hte gap gasat ai kaw na, majan laja wa ai re lam chye lu ai.
Ya na zawn Drone hte htim gasat wa ai hpang kaw na, Myen hpyen dap maga de na mung, nbungli hte nhtoi 3 ya tup laja lana wa htim gap gasat wa ai re.
Dai zawn htim gasat nga ai hta, Myen hpyen dap maga sum machyi lam ni law wa ai majaw, Myen hpyen dap kata na pru nna, mung shawa ni nga ai shara de sa hprawng yen ai lam ni mung nga wa ai hpe chye lu ai.
Sum machyi lam law taw nga ai Myen hpyen dap gaw, Munggu Myen hpyen dap shara hte laknak dum ngu maram lu ai shara hpe, November praw 6 ya shana kapaw jahten kau da nna, hprawng yen ma ai nga, dai ginra na hpyen magam gun langai KNG de tsun dan ai re.
Munggu Myen hpyen byuha hpe, kapaw jahten kau ngut ai, hpang jahpawt hta mung, dai shara hpe Myen hpyen dap ni nbungli hte bai wa gap bun wa ai lam nga ai re hpe matut chye lu ai.
Ya ten Munggu ginra yawng hpe, dap hpawm maga zing madu la lu sai rai tim, Myen hpyen dap maga nbungli hte bai wa gap na hpe hkrit tsang ai majaw, mung shawa ni matut hprawng yen taw nga ai re.
Munggu Bang Lum Bum hpe htim gasat zing ai hta, Myen hpyen dap up Dukaba si mat ai lam chye lu ai.
Munggu mare na mung shawa ni gaw, ya ten, Miwa jarit, Munggu hka kau mayan hta hprawng yen hkawm taw nga ai lam chye lu ai.
