Manmaw mare kaba hta du wa na November 23 kaw na 25 ya shani du hkra galaw na matu hkyen da ai manau poi kaba hpe, aten galoi n masat ai sha htawt sit kau sai lam, Manmaw Htunghking Hpung kaw nna chye lu ai.
Jinghpaw mung shara shagu majan laja lana byin nga ai ten mung shawa ni jam jau taw nga ai majaw, ya na zawn htawt sit kau ai re nga, Manmaw ginwang, Jinghpaw Wunpawng Laili laika hte htunghking hpung amu madu Sara Malang Tu Nan KNG shiga dap de tsun dan ai re.
“Ndai hpe madung jahkring ai gaw, ya ten anhte ginra shara shagu de nbungli hte wa gap ai majaw, yawng tsinyam hkrum taw nga ai majaw hte mung shawa law law ninghkap ai majaw, aten gan htawt sit ai re,” nga tsun dan ai re.
Lai wa sai ten, hpa byin tim manau poi galaw na matu dawdan hkyen lajang shajin da ai rai tim, mung shawa law law ninghkap wa ai hte, dai poi shabyin shatai hta lawm ai salang law malawng ninghkap n shang lawm wa ai majaw, aten nhtoi masat ai sha, htawt sit kau ai re lam chye lu ai.
Ndai manau poi lamang hpe galoi ten galaw na ngu ai hpe aten n masat da lu ai rai tim, mung masa pyaw ai ten hta bai galaw sa wa na re lam chye lu ai.
Manmaw ginwang, Jinghpaw Wunpawng Laili laika hte htunghking hpung kaw nna, Manmaw muklum kata gaw gap shangut da sai Manau wang kapang, Naura Pa, Manau Shadung hpaw poi hte nlung nnan sha sut manau poi kaba hpe 2023 ning November 23 kaw na 25 ya shani du hkra galaw na matu hkyen lajang da ai hpe, aten n masat htawt sit kau sai rai nga ai.
