Wunpawng Mungdan Shanglawt Hpyendap KIA Dapba 7, Pangwa, Hpare mare hta ga sau htu masing ning hkap ai amyu shayi marai 25 hpe, KIA dung 33 ni rim sharen da ai lam chye lu ai.
October 23 ya shani, hkying 2 daram aten, Hpare lawu mare ga sau (Rare Earth) htu ai hta lit nga ai Shanglawt Du Salang ni hpe, mare na kanu num ni sa ning hkap ai ten rim hkrum ai re nga nna, ginra masha langai KNG shiga dap hpe ning nga tsun ai re.
“Mana de hkying 2 kaw sa tsun ai, hkying 2 minutes 5 kaw woi mat ai. Mare masha ni gaw, tsan tsan de galaw sha marit, ngu na sa tsun ninghkap ai hta, mani gaw hkyuk htawng kaw, rim bang da ai rai nga ai. ‘galaw sha na raitim, makau group byin tsan ai shara de, galaw sha marit, ndai kaw hkum galaw sha’ ngu sa tsun ai rai nga ai. dai majaw sa tsun ai kanu num ni marai 25 hpe hkyuk htawng kaw rim sharen da ai.” nga nna tsun ai re.
Hpare mare masha ni a hkauna, sun makau, dum n ta gaiwang makau hkan du hkra, ga sau htu shaw shang wa ai majaw, mare masha ni ja ja ninghkap nga ma lam matut chye lu ai.
Hpare mare hta lai wa sai February shata kaw nna, ga sau htu shaw hpang wa ai re. Dai ten hta lamu ga htu sha hkrum ai dum nta masha ni hpe sum machyi manu jaw na nga nna, lit nga ai ni kaw nna ga sadi jaw da ai lam mung nga ai re.
Raitimung, ya ten hta gaw mare kata, yi sun, hkau na, nta makau hkan du hkra, ga sau htu shang wa ai majaw, mung mare masha ni n gun madun ninghkap ai lam, shanglawt uphkang rung de laika bang ai lam, alang alang galaw wa sai lam chye lu ai.
“Ninghkap ai gaw, moi ya kaw na re sai, lanam ta ladaw tup ninghkap wa ai re. ya mung ninghkap dingyang re kaw, mani gaw hkyukhtawng kaw rim bang hkrum ai rai nga ai. mi n gun madun ai shawng daw e hkan gaw, mare masha ni nga ai, yi sun hkau na, makau group byin hkan ga sau n htu na matu, langai the langai chye na hkat da sai rai nga ai, raitim de hpang, ya byin ai gaw, shanhte bai htu shaw shang wa ai majaw, mare na dinggai ni bai sa tsun ai kaw hkyuk htawng kaw rim bang kau ai rai nga ai.” nga nna hpare mare masha wa matut tsun dan ai re.
Ya byin ai gaw, Hpare lawu kahtawng lawk mare kaw rai nna, htingaw 50 daram nga ai lam chye lu ai.
Ga sau htu shaw ai hta lang ai, Acid tsi hpan gaw makau grup yin shingra tara, hka shi ni hpe hten za shangun ai sha n ga, shinggyim nga pra lam hpe laja lana hkra machyi shangun ai majaw, mare masha ni myit tsang nna, mare hte ni kahtep ai hkan, ga sau n htu na matu ninghkap shakut nga ai lam rai nga ai re.
Shanglawt Uphkang ginra, Nba pa ginra hta ga sau htu shaw masing hpe mung shawa n gun shadat ninghkap ai majaw, April shata hta Shanglawt asuya kaw nna, Nba Pa, Dingsing pa ginra na, ga sau htu shaw masing hpe dawm jahkring kau ya ai rai nga ai.
